Forcat e Ukrainës po shtyjnë avancimin e tyre në lindje dhe jug, duke i detyruar trupat ruse të tërhiqen nën presion në të dy frontet.
Presidenti Volodymyr Zelensky tha se ushtria e Ukrainës kishte bërë përparime të mëdha dhe të shpejta kundër forcave ruse javën e kaluar, duke marrë dhjetëra qytete në rajonet në jug dhe në lindje që Rusia i ka shpallur të aneksuara.
Ekspertët ushtarakë thonë se Rusia është në pikën e saj më të dobët, pjesërisht për shkak të vendimit të saj për të mos u mobilizuar më herët dhe pjesërisht për shkak të humbjeve masive të trupave dhe pajisjeve, shkruan The Guardian.
Në rajonin Kherson, Ukraina ka zgjeruar zonën e saj të kontrollit me gjashtë deri në 12 milje, sipas komandës jugore të ushtrisë së saj.
Zelensky konfirmoi rimarrjen e fshatrave Novovoskresenske, Novohryhorivka dhe Petropavlivka, duke thënë se vendbanimet u “çliruan nga referendumi i rremë dhe u stabilizuan.”
Guvernatori i emëruar nga Moska i rajonit Kherson, Kirill Stremousov, tha se tërheqja e Rusisë ishte një “rigrupim” taktik për “të dhënë një goditje hakmarrëse”. Shtrirja e tërheqjes së Rusisë mbetet e paqartë për momentin.
Ministri i Mbrojtjes i Ukrainës, Oleksii Reznikov, tha se ushtarët e tij vazhdojnë të ecin përpara në ofensivën e vjeshtës.
“Ndërsa ‘parlamenti rus’ është i dehur nga përpjekjet e kota për aneksim, ushtarët tanë vazhdojnë të ecin përpara. Kjo është përgjigjja më e mirë për çdo ‘referendum’, ‘dekret’, ‘traktat’ dhe fjalime patetike”, tha ai në një postim në Twitter. /abcnews.al
