Flet një nga turistët italianë, i cili shpëtoi për mrekulli pasi jahti me të cilin po udhëtonte në brigjet shqiptare u mbyt pas përplasjes me disa shkëmbinj nënujorë.
Policia bën me dije se ngjarja ndodhi rreth orës 05:30, në zonën e quajtur “Hunda e Plakut”, në plazhin e Zvërnecit .
Në bord ndodheshin 4 turistë italianë, përfshirë një fëmijë.
Një nga turistët ka treguar se ishin nisur nga Sllovenia dhe gjithçka ka ndodhur në orët e para të mëngjesit. Sipas tij, jahti nuk kishte asnjë problem dhe shkak u bënë shkëmbinjtë nënujorë të pasinjalizuar.
Lexo edhe: Përmbytet jahti në bregdetin e Zvërnecit, shpëtojnë turistët italianë
“Skafi nuk kishte asgjë. U nisëm nga Sllovenia. Udhëtuam në gjithë Kroacinë, Malin e Zi, Bosnje-Hercegovinë dhe nuk patëm asnjë problem. Pastaj në orën 04:30 të mëngjesit ndodhi incidenti në brigjet e Shqipërisë. Shkëmbinjtë duhen sinjalizuar, për fat të keq nuk ishin sinjalizuar dhe u goditëm. Por për fat të mirë nuk vdiqëm, vdiq varka. Ishim 4 persona, përfshirë një fëmijë”, tha turisti italian.
Policia informon se jahti drejtohej nga 61-vjeçari G.V, banues në Pavia, Itali. Në mjet ndodheshin shtetasit M. R., 38 vjeç, K. B., 33 vjeçe dhe një i mitur, banues në Pavia, Itali.
Të dëmtuarve u është dhënë ndihma e parë dhe janë në gjendje të mirë shëndetësore. Policia vijon hetimet për të zbuluar shkaqet e aksidentit./abcnews.al/
