U gjet në kontenierin me mish pule, policia jep detaje për “të bardhën” në Durrës: Ku do të shkonte

Policia ka dhënë detaje për kapjen e një sasie kokaine në portin e Durrësit, mbrëmjen e sotme. Bëhet me dije se në një kontenier të ngarkuar me mish pule, që ishte nisur tranzit nga Brazili janë gjetur 45 kilogramë e 500 gramë lëndë e dyshuar narkotike kokainë. Mishi ishte porositur nga një subjekt tregtar në Maqedoninë e Veriut.

Sakaq, sasia e lëndës narkotike ishte e ndarë në 40 pako dhe vlera e saj shkon në 45 kg. Policia në bashkëpunim me prokurorinë vijojnë hetimore për dokumentimin e plotë, identifikimin dhe kapjen e personave të përfshirë në të.

Lexo edhe: FOTO-LAJM/ 45 kg kokainë e mbështjellë me “Gokun”, si ishte kamufluar malli i kapur në Portin e Durrësit

Njoftimi i policisë:

Port, Durrës – Task Forca permanente e përbashkët e përbërë nga Policia Kriminale e DVP Durrës, Policia Kufitare e Portit të Durrësit dhe autoritetet doganore të Portit, evidentojnë dhe godasin një tjetër rast të trafikimit të lëndëve narkotike.

Finalizohet një tjetër operacion policor antidrogë, i koduar “Tranziti”.

Operacioni, nga Task Forca permanente e përbërë nga strukturat hetimore të Drejtorisë Vendore të Policisë Durrës, Policia Kufitare e Portit të Durrësit dhe autoritetet doganore të Portit.

Sekuestrohen 45 kilogramë e 500 gramë lëndë e dyshuar narkotike kokainë.

Në vijim të goditjeve të njëpasnjëshme ndaj veprimtarisë kriminale të tentativës për trafikim të drogave të forta, si rezultat i kontrolleve të shtuara, bazuar edhe në analizën e riskut të bërë nga Task Forca permanente e përbërë nga Policia Kriminale e Drejtorisë Vendore të Policisë Durrës, Policia Kufitare e Portit të Durrësit dhe nga autoritetet doganore të Portit, e cila vepron në Portin e Durrësit, në bazë të dyshimeve të krijuara nga kjo Task Forcë dhe informacioneve që dispononte Policia Kriminale e DVP Durrës, është ushtruar kontroll i detajuar në një kontenier të ngarkuar me mish pule, që ishte nisur tranzit nga Brazili, për llogari të një subjekti tregtar në Maqedoninë e Veriut.

Si rezultat i kontrollit të imtësishëm të ushtruar në kontenier, në brendësi të ngarkesës me mish pule u gjetën 40 pako me lëndë të dyshuar narkotike kokainë, me peshë 45 kg e 500 gramë.

Grupi hetimor, nën drejtimin e Prokurorisë pranë Gjykatës së Rrethit Gjyqësor Durrës, vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të përfshirë në të.

Materialet do t’i kalojnë Prokurorisë pranë Gjykatës së Rrethit Gjyqësor Durrës, për veprën penale “Trafikimi i lëndëve narkotike”.

g.v/abcnews.al