Zjarret e pakontrolluara kanë shpërthyer në Greqi dhe Turqi, duke detyruar mijëra persona të evakuohen. Një zjarrfikës ka humbur jetën në periferi të Athinës në një zjarr të madh pyjor që kërcënoi parkun më të rëndësishëm kombëtar të kryeqytetit grek.
Tetë persona kanë humbur jetën në Turqi, në zjarret që përfshinë zonat e bregdetit jugor gjatë 10 ditëve të fundit. Në Greqi, shefi i Mbrojtjes Civile Nikos Hardalias tha se zjarrfikësit u përballën me “kushte jashtëzakonisht të rrezikshme”, ndërsa luftuan me 154 vatra zjarri të premten, me 64 që ende janë vatra aktive.
“Gjatë ditëve të fundit ne jemi përballur me një situatë të paprecedent në vendin tonë, në intensitetin dhe shpërndarjen e gjerë të përhapjes së zjarreve dhe shpërthimet e reja në të gjithë Greqinë,” tha ai në një deklaratë ditën e djeshme.
Mijëra persona janë evakuuar nga fshatrat dhe ishullin e Evia, si dhe vendbanime të largëta në periferi të Athinës. Zhvendosja e erërave bëri që flakët jashtë Athinës dhe Evias të ndryshonin drejtimin duke kërcënuar zonat që i kishin shpëtuar shkatërrimit të flakëve në fillim të kësaj jave, raporton abcnews.al
Një zjarrfikës 38-vjeçar humbi jetën në një zonë në veri të Athinës të prekur nga zjarri. Autoritetet po hetojnë ende shkaqet e zjarrit, Hardalias tha se tre persona u arrestuan të premten – në zonën më të madhe të Athinës, Greqinë qendrore dhe jugore – nën dyshimin për ndezjen e flakëve, në dy raste me qëllim.
Në fshatin Limni në Evia, më shumë se 1.000 banorë u evakuuan. Roja bregdetare evakuoi gati 700 banorë dhe pushues nga pjesë të tjera të ishullit, duke përdorur anije patrullimi, anije peshkimi dhe anije të tjera private.
Një anije e rojës bregdetare shpëtoi gjithashtu 10 persona të tjerë të bllokuar në një plazh nga një zjarr tjetër pranë qytetit Gythio në rajonin jugor të Peloponezit. Zyrtarët grekë dhe europianë kanë fajësuar ndryshimet klimatike për zjarret e shumta në Europën jugore, nga Italia jugore në Ballkan, Greqi dhe Turqi.
Në Itali, zjarrfikësit që luftonin me një zjarr në provincën e Reggio Calabria gjetën trupat e një burri dhe një gruaje në një ullishte. Agjencia e lajmeve LaPresse tha se ata vdiqën nga asfiksimi.
Zjarre masivë janë përhapur në të gjithë Siberinë në veri të Rusisë për javë të tëra, ndërsa moti i nxehtë ka shkaktuar gjithashtu zjarre shkatërruese në Kaliforni. Greqia ka regjistruar temperaturat më të larta në tre dekada, me temperatura 45 gradë Celsius, raporton abcnews.al
Më shumë se 1.000 zjarrfikës dhe gati 20 avionë tani po luftojnë me zjarret e mëdha në të gjithë Greqinë, ndërsa Franca, Zvicra, Rumania, Qipro, Kroacia, Izraeli dhe Suedia kanë dërguar zjarrfikës, aeroplanë, helikopterë dhe automjete për të ndihmuar në shuarjen e flakëve.
Në Turqi, autoritetet evakuuan të premten banorët në gjashtë lagje pranë Mugla, Milas. Gjatë ditës gjithashtu u evakuuan edhe banorët e dy lagjeve të tjera si masë paraprake, pasi një zjarr tjetër u përhap nga rajoni i Yatagan, në Mugla, në skaj të provincës fqinje të Ajdinit, më në veri.
Të paktën 36,000 njerëz u evakuuan në provincën Mugla, thanë zyrtarët. Përhapja e zjarreve pranë vendpushimit turistik të Marmaris, gjithashtu në Mugla, u vu në kontroll të enjten, ndërsa të premten pasdite u vunë në kontroll dy zjarret kryesore në provincën fqinje Antalia.
Në Greqi, zjarret e përhapura në Athinë bllokuan trafikun në autostradën kryesore që lidh kryeqytetin në veri të vendit dhe dëmtoi instalimet e energjisë elektrike. Kompania e shpërndarjes së energjisë njoftoi ndërprerje të vazhdueshme në rajonin më të gjerë të kryeqytetit për të mbrojtur rrjetin elektrik.
Në rajonin jugor të Peloponezit, janë evakuuar të gjithë banorët e fshatrave. Zjarret gjithashtu pezulluan fushatën e vaksinimit kundër COVID-19. Ministria e Shëndetësisë njoftoi pezullimin e vaksinimeve në zonat e prekura nga zjarri.
Kryeministri Kyriakos Mitsotakis tha në një fjalim televiziv të enjten se zjarret paraqesin “realitetin e ndryshimit të klimës”.
Në vitin 2018, më shumë se 100 persona humbën jetën pas shpërthimit të një zjarri në lindje të Athinës. s.ba/abcnews.al
