Donald Trump ka deklaruar se takimi mes tij dhe Kim Jong-un është ende i mundur. Një ditë pasi njoftoi anulimin e tij, Trump e ka lënë të hapur mundësinë e tryezës me liderin korean, në vartësi të zhvillimeve të ditëve në vazhdim.
Presidenti amerikan, Donald Trump, ka deklaruar të premten se takimi mes tij dhe liderit koreano-verior mund të mbahet, edhe pse një ditë më parë ai njoftoi anulimin e tij.
“Të shohim ç’do të ndodhë. 12 Qershori mund të bëhet realitet. Ne jemi në kontakt me ta. Ata e dëshirojnë takimin dhe ne po ashtu”, ka thënë Trump për gazetarët.
Të enjten, kur njoftoi tërheqjen nga samiti i shumëpritur, presidenti fajësoi retorikën armiqësore të Koresë së Veriut për vendimin e tij. Momente më vonë, Peniani reagoi duke shprehur vullnetin për t’u takuar në çdo kohë dhe çdo mënyrë.
Samiti i 12 Qershorit në Singapor do të kishte qenë i pari mes një presidenti amerikan dhe një lideri koreano-verior. Detajet e tij vazhdojnë të jenë të rezervuara, por fokusi kryesor do të ishte çarmatimi bërthamor i gadishullit Korean dhe ulja e tensioneve.
Vetëm pak orë para njoftimit të Trump, regjimi i Penianit mbajti premtimin për çmontimin e tuneleve të impiantit të tij bërthamor. Sidoqoftë, të premten Trump ka ringjallur shpresat dhe ka mirëpritur deklaratën e regjimit.
“Të shohim ç’do të ndodhë, deklarata e tyre ishte shumë pozitive”, ka thënë Trump, duke shtuar se tek e fundit “të gjithë bëjnë lojra”.
Ndërkohë, sekretari i Mbrojtjes, James Mattis ka përshëndetur komentet e kreut të shtetit.
“Kemi disa lajme të mira për samitin korean, i cili, në vartësi të përpjekjeve diplomatike, mund të mbahet”, ka thënë Mattis./abcnews.al
