E fundit që u nxorr e pajetë nga ujërat e ftohtë të lumit Buna ishte Alma Arrazi.
39 vjeçarja, e cila vendosi tragjikisht fatin e saj dhe të tre fëmijëve duke u hedhur nga ura mbi Bunë mbrëmjen e dy majit, u gjet në afërsi të fshatit Pentar, rreth orës 13 e 30 në vendin e quajtur “Shkalla e Belnit”.
Më herët, mesditën e të martës polumbarët nxorrën pa jetë më të voglin e familjes Arrazi.
Trupi i tre vjecarit u zbulua rreth mesditës së të martës midis zonës së quajtur “Ana e malit” dhe fshatit Oblikë, afro 1 km nga vendi ku të hënën u gjet motra e tij 8 vjeçare.
Teksa Almën e nxirrnin nga lumi ku e pajetë endej prej 5 ditësh, ai që dyshohet se e çoi drejt vetëvrasjes duke e dhunuar psikologjikisht, kercenuar dhe tradhetur u paraqit në gjykatë.
Seanca ndaj Erdgys Arrazit u zhvillua me dyer të mbyllura.
Edhe pse i riu mohoi me ftohtesi akuzat e ngritura ndaj tij Gjykata vendosi që ai të qëndrojë pas hekurave deri në përfundim të hetimeve.
Të hënën, motra e Alma Arrazit në një komunikim jashtë kameras tha për abc neës se mes ciftit dy vitet e fundit ka pasur konflikte të vazhdueshme dhe shkak ishte bërë lidhja jashtë martesore e 31 vjecarit.
“Erdgysi i ka dashur fëmijët por jo Almën edhe pasi kishte krijuar lidhjen e re ushtronte dhunë psikologjike duke e ofenduar dhe kërcënuar. Gjithcka ka nisur pas lidhjes jashtëmartesore që Erdgysi kishte me një vajzë të re rreth 18 vjecare. Në këto momente Erdgysi filloi të distancohej nga familja e tij”
Ngjarja që tronditi shkodrën e mbarë vendin ndodhi mbrëmjen e dy majit, kur Alma Arrazi pasi takoi përreth dy orë motrën e bashkëshortit u drejtua urës së vjetër të Bunës, nga ku vendosi të takojë vdekjen pa u ndarë nga tre të vegjlit e saj./abcnews.al
