Një fatkeqësi në prag, dhe një lajm I madh. Tirana dhe Teuta janë dy nga ngjarjet kryesore të javës së parafundit të Superligës, pasi kryeqytetasit ndodhen në prag të rënies në Kategorinë e Parë, ndërsa durrsakët siguruan mbijetesën.
Kjo, pas duelit mes tyre në “Arenën Kombëtare”, fituar 1-0 nga ekipi bregdetas.
Mario Beshiraj siguroi pikët dhe elitën për miqtë, me golin e shënuar 10 minuta para fundit, në të 80-ën.
Dramë e vërtetë për 26 herë kampionët e vendit, pasi rekordmenëve për titull mund të mos u mjaftojë as fitorja javën e fundit ndaj Dinamos për të shpëtuar, pasi ka 36 pikë, po aq sa Laçi I fundit dhe dy më pak se Skënderbeu.
Nëse do të ndodhte tragjedia, kjo do të ishte hera e dytë që Tirana do të binte nga Superliga pas asaj në 2017.
Ndodhia tjetër tepër e rëndësishme e javës së 35-të është rokada në garën për një vend në plej ofin për titull mes Elbasanit dhe Partizanit.
Kjo, pasi skuadra elbasanase u ngjit në vendin e katërt, ndërsa të kuqtë zbritën në të pestin.
Ekipi I drejtuar nga trajneri Gvozdenovic barazoi 1-1 ndaj Vllaznisë në “Elbasan Arenë”.
Kapiteni Balaj kaloi në epërsi shkodranët në 47’, por vendasit nuk u dorëzuan dhe Amarildo Gjoni barazoi në 80’. Partizani, ndërkaq, nuk përballoi dot sfidën e Bylisit në Ballsh.
Mallakastriotët ia dolën me rrjetën nga Fabjan Përndrecaj në 67’ dhe aktualisht janë në vendin e 7-të, në zonën e shpëtimit, kurse të kuqtë kanë 50 pikë, po aq sa Elbasani, por me bilanc negativ në ndeshjet direkte.
Skënderbeu po ashtu mori pikë të rëndësishme në Rrogozhinë ndaj Egnatias kampione.
Barazimi 0-0 bën që korçarët të jenë në vend të 8-të, dhe për momentin janë në zonën e një finaleje të vogël për mbijetesë me një ekip të Kategorisë së Parë.
Ndërkaq, Laçi ka ende shpresë edhe pse është I fundit, pasi mundi 1-0 Dinamon.
