Loading ...
Bashkimi Europian ka urdhëruar rrjetin social TikTok që të bllokojë përkohësisht të dhënat që lidhen me zgjedhjet në Rumani, pas dyshimeve për ndërhyrje ruse.
Zyrtarët e unionit lëshuan një urdhër ndalimi sipas Aktit të Shërbimeve Dixhitale, i cili rregullon se si operojnë kompanitë më të mëdha të mediave sociale në Evropë.
Një zëdhënës i Tiktok tha se kompania ka bashkëpunuar me Komisionin Europian dhe shprehu gatishmërinë për të vërtetuar faktet përballë spekulimeve të pasakta që janë bërë.
Shtetet e Bashkuara gjithashtu shprehën shqetësimin për ndërhyrjen e mundshme të huaj në zgjedhjet e Rumanisë, pasi ultranacionalisti pro-rus Calin Georgescu fitoi në raundin e parë të garës presidenciale.
Partitë e ekstremit të djathtë gjithashtu patën rezultate të mira në zgjedhjet parlamentare të Rumanisë të dielën e kaluar, megjithëse socialdemokratët e majtë në pushtet morën më shumë vota dhe shpresojnë të krijojnë së bashku një qeveri koalicioni pro-europiane.
Dokumentet e deklasifikuara nga zyrtarët rumunë të sigurisë treguan se Georgescu u promovua masivisht në platformën e mediave sociale TikTok përmes llogarive të koordinuara, algoritmeve dhe promovimit me pagesë. Vetë Georgescu deklaroi zero fonde të shpenzuara në fushatë.
Në dokumente thuhej se Rumania kishte qenë objektiv i sulmeve hibride agresive ruse.
Rusia ka mohuar çdo ndërhyrje në fushatat zgjedhore të Rumanisë.
Nëse Georgescu fiton në raundin e dytë të 8 dhjetorit, ai ka të ngjarë të përpiqet të izolojë Rumaninë jashtë vendit dhe të ndryshojë qasjen e saj pro-BE. / abcnews.al
