Mbi 800 tërmete me magnitudë mbi 2 të shkallës Rihter kanë goditur Shqipërinë që pas 26 nëntorit të vitit të shkuar. Pasgoditje e tij ishte edhe tërmeti i së martës sipas sizmologut, Rrapo Ormeni i cili shpjegon se lëkundjet e tokës do të vijojnë ndonëse me intensitet më të ulët pasi vendi ka kaluar një periudhë me aktivitet të lartë sizmik.
“Paslëkundjet e këtyre tërmeteve vazhdojnë më disa muaj, deri tani kemi kaluar dy muaj, por ato vazhdojnë edhe në katër ose pesë muaj. Shpeshtësia ka qenë më e vogël”, thotë Ormeni.
Por tërmetet e regjistruara në vendin tonë nuk kanë lidhje me ato në Greqi dhe Turqi shpjegon sizmologu.
“Turqia ka tërmete të mëdhenj 7.1 deri në 7.9, kurse Shqipëria 6 dhe 6.9. Mekanizmi është i ndryshëm, janë tre pllaka që veprojnë, pllaka arabe, afrikane dhe ajo aziatike që i japin pllakës anatogene lëvizje drejt perëndimit. Pllaka anotogene është e madhe dhe ka dy thyerje të mëdha. Në ndyshim nga tërmetet e Shqipërisë është se këto thyrje janë me drejtime horizontale dhe tërmetet janë të cekët”, sqaron sizmologu.
Lëkundjet e tokës me magnitude 4.9 të shkallës Rihter kthyen edhe njëherë panikun tek banorët e Durresit dhe Tiranës. Tërmeti kishte epiqendër fshatin në Bubq të Fushë-Krujës dhe thëllësi 7 kilometra./abcnews.al
