Mbrojtja Civile e Rripit të Gazës njoftoi se të paktën 40 njerëz u vranë gjatë natës nga bombardimet izraelite në zonën e deklaruar humanitare të Al Mawasi, në Khan Yunis në jug, ndërsa forcat e armatosura izraelite raportuan nga ana e tyre se ata goditën “qendrën komanduese” të Hamasit.
“Dyzet njerëz u vranë dhe më shumë se 60 u plagosën, ndërsa shumë janë ende nën rrënoja”, tha drejtori i operacioneve të autoritetit të Mbrojtjes Civile të Hamasit për BBC.
Në një deklaratë, një zëdhënës i Forcave të Mbrojtjes të Izraelit (IDF) tha se ushtria kishte sulmuar “terroristë të rëndësishëm të Hamasit që vepronin brenda një qendre komandimi dhe kontrolli të ngulitur brenda Zonës Humanitare në Khan Yunis. Organizatat terroriste në Rripin e Gazës vazhdojnë të abuzojnë sistematikisht me infrastrukturën civile dhe humanitare, duke përfshirë Zonën e caktuar Humanitare, për të kryer aktivitete terroriste kundër Shtetit të Izraelit dhe trupave të IDF.”
Hamasi hodhi poshtë pretendimet e ushtrisë izraelite se kishte luftëtarë të Hamasit të pranishëm në zonë, duke e quajtur atë një gënjeshtër “të hapur”.
Mijëra palestinezë të zhvendosur kanë ikur në Khan Younis që kur Izraeli filloi fushatën e tij ushtarake në territor tetorin e kaluar.
Operacioni tokësor filloi në përgjigje të sulmit të paprecedentë të Hamasit në Izraelin jugor më 7 tetor, në të cilin rreth 1200 u vranë dhe 251 u morën peng.
Më shumë se 40,900 njerëz janë vrarë në Gaza që atëherë, sipas ministrisë së shëndetësisë të territorit të Hamasit./abcnews.al
