Turqia ka pranuar se Suedia dhe Finlanda kanë ndërmarrë hapa konkretë për të përmbushur shqetësimet e Ankarasë në lidhje me ofertat e tyre për t’u anëtarësuar në NATO dhe të treja shtetet do të mbajnë takime të mëtejshme.
“Ne shohim se Turqia pranoi se Suedia dhe Finlanda kanë ndërmarrë hapa konkretë në këtë marrëveshje, që është një shenjë e mirë,” tha kryenegociatori suedez, Oscar Stenstrom në një konferencë për shtyp në selinë e NATO-s pas rifillimit të bisedimeve trepalëshe.
Zëdhënësi i presidentit Erdogan, Ibrahim Kalin, deklaroi se hapat e ndërmarrë nga Suedia dhe Finlanda për të adresuar shqetësimet e sigurisë së Ankarasë ishin pozitive, por jo të mjaftueshme për ratifikimin e ofertës së tyre në NATO nga Turqia.
“Ne kemi theksuar edhe një herë shqetësimet dhe pritjet e sigurisë së Turqisë. Hapat që do të ndërmarrin vendet do të përcaktojnë rrjedhën dhe shpejtësinë e kësaj çështjeje”, theksoi ai.
Suedia dhe Finlanda aplikuan vitin e kaluar për t’u bashkuar me NATO-n, por u përballën me kundërshtime nga Turqia, e cila thotë se të dy vendet strehojnë anëtarë të Partisë së Punëtorëve të Kurdistanit (PKK), të konsideruar si një grup terrorist nga Ankaraja dhe aleatët e saj perëndimorë./abcnews.al
