Revista TIME e shpalli atë “personi i vitit” për vitin 2023. Në moshën vetëm 33 vjeç, “fenomeni” i Taylor Swift po prek miliona njerëz në këtë botë në çdo mënyrë. Përveçse në kulmin e karrierës së saj, Taylor duket se është një model për ata që merren me çrregullime të të ngrënit. Ky është përfundimi i një studimi të ri.
Në rast se nuk e dinit, Taylor Swift ka qenë “e hapur” për “betejat” e saj me imazhin e trupit dhe çrregullimin e të ngrënit. Vetëm kjo është e mjaftueshme për të frymëzuar dhe fuqizuar njerëzit e tjerë. “Nuk e dija nëse do të ndihesha rehat të flisja për imazhin tim të trupit dhe të flisja për gjërat që kam kaluar në lidhje me atë se sa e pashëndetshme ishte për mua, marrëdhënia ime me ushqimin ndër vite”, kishte thënë këngëtarja, ndër të tjera, në dokumentarin “Miss Americana”.
Nga një këndvështrim kërkimor tani, autorët e një studimi të Universitetit të Vermontit (UVM) të botuar në botimin e korrikut të revistës Social Science & Medicine arritën në përfundimin se fansat e Taylor, të cilët ndiheshin fort të lidhur me të, u ndikuan për të ndryshuar sjelljen ose qëndrimin e tyre rreth ushqimit, madje edhe pamja e trupave të tyre.
Studiuesit analizuan 200 postimet kryesore në mediat sociale, TikTok dhe Reddit, të cilat përmbanin më shumë se 8,300 komente për Taylor Swift, çrregullimet e të ngrënit dhe trupin.
“Gjetjet tona sugjerojnë se fansat që ndiheshin fort të lidhur me Taylor Swift u ndikuan të ndryshonin sjelljen ose qëndrimet e tyre rreth ushqimit ose imazhit të trupit të tyre pas zbulimeve të këngëtares dhe mesazheve që ajo përcjell përmes muzikës së saj”, tha bashkautorja e studimit Lizzie Pope, dietologe-nutritioniste dhe profesore e asociuar në departamentin e ushqimit dhe shkencës ushqimore të UVM.
Përveç kësaj, fansat e Taylor duket se janë frymëzuar nga fakti se këngëtarja është shëruar nga çrregullimet e të ngrënit dhe tani është shumë më mirë./abcnews.al
