Mjekët e urgjencës dhe reanimacionit në Lezhë do t’i nënshtrohen disa trajnimeve për dhënien e ndihmës së parë. Pjesa më e madhe e personelit janë të pa specializuar për të ofruar këtë shërbim dhe sipas drejtorit të Spitalit të Lezhës, Leon Kaza, nuk mjafton vetëm diploma për të shpëtuar pacientët në minutat e para.
Ndihma e parë shpëton jetë. Nëse nuk ofrohet nga mjekët siç duhet, vihet në rrezik pacienti. Në spitalin e Lezhës, bluzat e bardha nuk janë në standartin e duhur për të ofruar këtë shërbim.
Për këtë arsye është kërkuar me insistim trajnimi i të gjithë stafit. Drejtori i spitalit Lezhë, Leon Kaza thotë se nuk mjafton diploma për ta kryer këtë mision.
Leon Kaza: “Sot të kesh një diplomë nuk do të thotë që je gjithmonë i përgatitur për të bërë një veprim të caktuar në një moment emergjent. Kërkohen gjithmonë trajnime, gjithmonë përditësime për të treguar që je i aftë për të kryer sipas standardeve të cilësisë dhe sigurisë të shërbimit ndaj pacientëve”.
Dhënia e ndihmës së parë mund të realizohet me sukses vetëm nga specialistë apo persona të trajnuar.
Trajnimin në spitalin e Lezhës e morën një personel prej 10 mjekësh dhe 60 infermierë që shërbejnë në repartin e urgjencës dhe reanimacionit.
Ky trajnim është pararendës i simpoziumit shkencor që do të organizohet nga Spitali rajonal Lezhë me rastin e 50-vjetorit të shërbimit spitalor./abcnews.al
