Fshati Skuraj në Kurbin, i përzgjedhur edhe si një ndër 100 fshatrat turistik në vendin tonë, ka një histori mjaft interesante.
Kisha e Shën Vlashit ndodhet në shpatin e vargmaleve të Skëndërbeut, aty ku edhe ndodhen rrënojat e shkollës së parë shqipe në vitin 1632.
Në fshatin Gallatë, disa kilometra larg nga Skuraj, ndodhet mulliri i famshëm i quajtur mulliri Fall, ku bluhej falas, një histori që daton që në kohën e heroit tonë kombëtar, Skënderbeu.
Më tej këtij fshati, ndodhet Vinjolla, një tjetër fshat me panoramë fantastike dhe histori, ku ndërthuren mjaft bukur malet me luginat dhe lumin e quajtur “Hardhuca”.
Ndonëse jemi në stinën e dimrit, pamja e mrekullueshme e natyrës të shoqëron kudo. Në të dyja anët e rrugës ndodhen malet, në lindje janë vargmalet e Skëndërbeut, ndërsa nga perëndimi ai i fshatit Mali i Bardhë.
Banorët janë larguar, ndërsa ato që kanë qëndruar, thonë se shkak mbetet amortizimi i rrugës.
Në tërë fshatrat, uji është i pijshëm për shkak të burimeve të shumta natyrore. Lumi që përshkon të gjithë fshatrat shfrytëzohet për energjinë në tre HEC-e të vogla dhe për vaditje në arat e fermerëve.
Kërkesa e tyre e vetme është investimi në rikonstruksionin e rrugës, një prioritet në rikthimin e banorëve në vendlindje, për të kthyer këto fshatra drejt zhvillimit./abcnews.al
