NGA Leontina Nika
Prej 16 muajsh skenat e teatrove dhe Cirku Kombëtar vazhdojnë të jenë të kyçura, shkak pandemia. Megjithëse numri i të infektuarve ka pësuar rënie të ndjeshme, sërish normaliteti për artistët dhe publikun duket i largët.
Ndodhur në këtë kushte Presidenti i Sindikatës së Pavarur të Artistëve të Shqipërisë Reshat Ibrahimi kërkon në mënyrë emergjente vaksinimin e trupave artistike.
Kreu i Sindikatës, Reshat Ibrahimi thotë se arti edhe në këtë rast është i fundit në listë, ndërkohë që sipas tij numri i artistëve në gjithë Shqipërinë është 700.
Ibrahimi thekson se pa vaksinimin masiv, rifillimi i aktivitetit në skenë i duket i largët. Sipas tij, shumë aktivitete artistike private, thyejnë edhe rregullat e grumbullimeve masive, ndërsa institucionet shtetërore penalizohen.
Reshat Ibrahimi thotë se në shtator me krijimin e qeverisë së re, sërish do i ripropozojnë Ministrisë së Kulturës, ligjin për artin, statusin e artistit, uljen e moshës së daljes në pension për disa profesione të vështira të artistëve, si dhe rishikimin e pagave te tyre, të cilat nuk kanë ndryshuar prej 6 vitesh. d.b/ Abcnews.al
