Nga Justin B.Hollander, The Hill
Përktheu: Sonila Backa-abcnews.al
Gjatë ditëve të fundit janë rritur shqetësimet mes analistëve dhe ekspertëve se presidenti rus Vladimir Putin mund të përdorë vetëm armë taktike bërthamore në luftën e tij kundër Ukrainës.
Duke pasur parasysh performancën mbresëlënëse të ushtrisë ukrainase të mbështetur nga NATO në fushën e betejës, Rusia mund të jetë vendi i parë që përdor armë bërthamore që kur SHBA-ja bombardoi Hiroshimën dhe Nagaskain në 1945.
Një veprim i tillë do të shkaktonte një sërë viktimash si dhe do të shkaktonte potencialisht një përgjigje bërthamore nga SHBA-ja ose fuqitë e tjera bërthamore të NATO-s. Më pas, ky skenar mund të çojë në një rezultat më të keq të fundit të botës, i cili ka qenë kryesisht i paimagjinueshëm që nga fundi i Luftës së Ftohtë.
Lajmi i mirë është se konflikti thelbësor që qëndron në themel të këtij konflikti mund të zgjidhet në mënyrë paqësore dhe ne mund të shmangim luftën globale termonukleare.
Arsyeja që motivoi pushtimin rus të Ukrainës buronte nga një marrëveshje midis SHBA-së dhe Ukrainës në nëntor 2021.
Në atë dokument, Karta e Partneritetit Strategjik, SHBA-ja deklaroi zyrtarisht mbështetjen për anëtarësimin e Ukrainës në NATO. Vetëm një muaj më vonë, në një letër drejtuar SHBA-së dhe aleatëve të saj, Rusia kërkoi që ata të anulonin atë marrëveshje dhe të garantonin me shkrim që Ukrainës t’i ndalohej anëtarësimi në NATO, raporton abcnews.al.
Kur SHBA refuzoi të tërhiqej, Rusia vendosi të pushtonte Ukrainën, duke çuar në një luftë rrënimi për tetë muajt e fundit. Politika aktuale e SHBA-së për furnizimin e Ukrainës me armë vdekjeprurëse dhe vendosjen e sanksioneve ekonomike të paprecedentë është përpjekur t’i bëjë kostot e luftës aq të larta sa Putini të dorëzohet.
Por padyshim që vetëm sa e ka zgjatur konfliktin, duke rritur dhimbjen dhe vuajtjet e popullit ukrainas. Merrni Sirinë si shembull: forcat pro-qeveritare të mbështetura nga Rusia kanë luftuar me milicitë e opozitës të mbështetur nga SHBA për më shumë se një dekada, duke shkaktuar rreth 115,000 viktima.
Retorika e Putinit rreth përdorimit të armëve bërthamore, madje duke pohuar se vetë SHBA-ja ka krijuar precedentin për ta bërë këtë, ka shqetësuar edhe më shumë botën.
Por ekziston një tjetër zgjidhje. Shtetet e Bashkuara dhe anëtarët e NATO-s duhet të ulen në një tryezë bisedimesh me Rusinë.
Kjo luftë midis Rusisë dhe Ukrainës, ka qenë më tepër një luftë midis Rusisë dhe NATO-s.
Kërkesa e Ukrainës për t’u bashkuar me NATO-n prish rendin që ka ekzistuar në Europë që nga shpërbërja e Bashkimit Sovjetik.
Kur Muri i Berlinit ra në vitin 1989, aleanca e Traktatit të Varshavës (e BRSS dhe vendeve të Europës Lindore) u shkatërrua shumë shpejt dhe barazia e ashpër që kishte ekzistuar midis tyre dhe NATO-s u zhduk papritur, duke e lënë NATO-n “të pambrojtur”.
Vendimet e Putinit rrjedhin nga një asimetri themelore midis NATO-s dhe Rusisë dhe zgjerimet e ardhshme të NATO-s më tej drejt lindjes sigurisht që e kanë përkeqësuar këtë çekuilibër.
SHBA-ja dhe NATO-ja kanë tani një shans për t’i ofruar Putinit një degë ulliri, për të ofruar revokimin e Kartës së Partneritetit Strategjik dhe për të ulur tensionet. (Miliarderi Elon Musk madje ka sugjeruar arritjen e një marrëveshjeje paqeje duke ia dhënë zyrtarisht Krimenë Rusisë.)
Nuk është në interesin e SHBA-së të përfshihet në një luftë bërthamore me Rusinë dhe dhënia e garancive të sigurisë për të lejuar Putinin të ruajë ndikimin në Ukrainën Lindore është një çmim i vogël që duhet paguar për paqen në botë.
/abcnews.al
