Përshtati në shqip nga Euro-Football.Ru Gerli Doko
Tërmeti që ndodhi më 6 shkurt në Turqi dhe Siri çoi në viktima njerëzore dhe shkaktoi dëme të mëdha në të gjitha sferat e jetës në këto vende. E njëjta gjë vlen edhe për futbollin.
Më 6 shkurt, një tërmet i tmerrshëm ndodhi në Turqi dhe Siri. Tashmë dihet se si pasojë e tij kanë humbur jetën më shumë se 45 mijë persona. Kjo ngjarje preku rëndë gjithë jetën në Turqi. Popullsia mbledh ndihma humanitare, dyqanet ushqimore i ofrojnë kujtdo ushqim. Natyrisht, tërmeti pati ndikim në futbollin si një nga aspektet e jetës së vendit.
Më të prekurit nga elementët, si për nga numri i viktimave, ashtu edhe për nga shkalla e shkatërrimit, ishin qytetet Gaziantep dhe Hatay, në të cilat ndodhen dy klube të Superligës turke. Fatkeqësisht mes të vdekurve ka edhe futbollistë. E gjithë bota ndoqi fatin e Christian Atsu, ndoshta lojtarit më të famshëm që luajti për Hatayspor. Në ditët e para u mor lajmi se ish-futbollisti i Chelsea ishte nxjerrë nga rrënojat, por agjenti i mesfushorit e mohoi këtë informacion. Një ditë tjetër, shpëtimtarët gjetën trupin e Atsu, i cili nuk mbijetoi. Siç doli, futbollisti ganez duhej të largohej një ditë para tërmetit, por në ndeshjen e tij të fundit shënoi në fund një gol ndaj Kasimpasit dhe qëndroi në Hatay për të festuar fitoren me shokët e tij, shkruan abcnews.al.
Vdiq edhe portieri i Yeni Malatyaspor, Ahmet Eyup Turkaslan. Trajneri i klubit të Iskenderunspor nga liga e tretë, Ibrahim Khalil Olmez, është gjetur i gjallë, por ka ndërruar jetë në terapi intensive. Për fat të mirë, lojtarët e Hataysporit, Burak Oksyuz, Bertug Yildirim dhe Kerim Alici u shpëtuan të gjallë nga rrënojat.
Në situatën aktuale është e pamundur të flitet për vazhdimin e sezonit për këto skuadra nga qytetet e prekura. Hatayspor dhe më pas Gaziantep njoftuan tërheqjen nga kampionati turk dhe i kupës së vendit. Ndërkohë, edhe Yeni Malatyaspor u tërhoq nga Liga e Dytë Turke.
Nuk dihet ende se çfarë do të ndodhë me sezonin futbollistik në Turqi. Fillimisht pritej që Superliga të rifillonte më 17 shkurt, por edhe turi tjetër u shty. Tashmë pritet që kampionati të vazhdojë më 25 shkurt, por nuk ka siguri të plotë për këtë. Përveç kësaj, nuk është e qartë se çfarë të bëhet me Gaziantep dhe Hatayspor.
Më 16 shkurt, Trabzonspor luajti një ndeshje në shtëpi kundër Baselit në Ligën e Konferencës dhe fitoi 1-0. Para ndeshjes, tifozët e mikpritësve organizuan një shfaqje, duke përshkruar një shpëtimtar në një helmetë me flamujt e të gjitha vendeve që dërguan njerëzit e tyre në Turqi për të ndihmuar në pastrimin e rrënojave. Madje, kjo tragjedi e bëri UEFA-n të harrojë politikën. Pra, në helmetën e shpëtimtarit të pikturuar kishte flamuj të Ukrainës dhe Rusisë.
Shumë futbollistë dhe klube ndihmojnë Turqinë. Mbrojtësi i kombëtares në ankand i shiti një fanellë Cristiano Ronaldos për 200 mijë euro, Lionel Messi ndau 3.5 milionë për të ndihmuar viktimat. Shumë klube evropiane mbështesin në mënyra të ndryshme të gjithë të prekurit nga tragjedia e tmerrshme.
Kur ndodhin tragjedi të kësaj përmasash, futbolli gjithmonë zë vendin e pasëm. Megjithatë, është e rëndësishme që në momente të tilla të bashkohen lojtarët dhe klubet nga e gjithë bota për të ndihmuar. /G.D abcnews.al/
