Loading ...
Ish-emiri i Katarit, Sheikh Hamad bin Khalifa Al Thani, ka ndërruar jetë në moshën 74-vjeçare. Lajmi u bë i ditur të dielën nga Amiri Diwan, institucioni më i lartë shtetëror i Katarit.
Sheikh Hamad udhëhoqi Katarin nga viti 1995 deri në vitin 2013, periudhë gjatë së cilës vendi u transformua nga një shtet i vogël me traditë beduine në një prej aktorëve më me ndikim në Lindjen e Mesme dhe në arenën ndërkombëtare. Në qershor të vitit 2013 ai abdikoi në favor të djalit të tij, Sheikh Tamim bin Hamad Al Thani, i cili vijon të jetë emiri i Katarit.
Gjatë sundimit të tij, Katari njohu një zhvillim të shpejtë ekonomik falë pasurisë së madhe të gazit natyror. Vendi u shndërrua në eksportuesin më të madh në botë të gazit natyror të lëngshëm duke forcuar ndjeshëm ndikimin e tij ekonomik dhe diplomatik.
Një nga trashëgimitë më të rëndësishme të Sheikh Hamad ishte krijimi dhe zhvillimi i rrjetit televiziv Al Jazeera, i cili u bë një prej mediave më me ndikim në botën arabe dhe më gjerë. Po ashtu, gjatë drejtimit të tij, Katari fitoi të drejtën për të organizuar Kupën e Botës FIFA 2022, turneu i parë botëror i futbollit i zhvilluar në Lindjen e Mesme.
Abdikimi i tij në vitin 2013 u konsiderua një hap i pazakontë për monarkitë trashëgimore të Gjirit Persik, me qëllim garantimin e një tranzicioni të qetë të pushtetit. Vetë Sheikh Hamad kishte ardhur në pushtet në vitin 1995, pasi rrëzoi babanë e tij në një grusht shteti. Vdekja e tij shënon fundin e një epoke për Katarin, pasi ai konsiderohet arkitekti i transformimit të vendit në një fuqi rajonale me ndikim të madh në ekonomi, diplomaci, media dhe sport. / abcnews.al /
