Joe Biden po përgatitet të shpallë një sërë masash mbi kuadrin rregullator për përdorimin e Inteligjencës Artificiale (AI) që synojnë kufizimin e rreziqeve që lidhen me teknologjinë në zhvillim.
Sipas Shtëpisë së Bardhë, presidenti amerikan do të nënshkruajë një urdhër ekzekutiv që do të vendosë rregulla të reja sigurie për të gjitha sistemet e Inteligjencës Artificiale dhe do të kërkojë nga agjencitë që i zhvillojnë ato të ndajnë me autoritetet amerikane rezultatet e testeve të sigurisë që do të kryejnë.
Qëllimi i dekretit presidencial është gjithashtu të parandalojë rreziqet që lidhen me zhvillimin e Inteligjencës Artificiale dhe të sigurojë që ajo të mos përdoret për të mashtruar konsumatorët.
IBM tha në një deklaratë se urdhri “dërgon një mesazh kritik: se AI i përdorur nga qeveria e Shteteve të Bashkuara do të jetë AI “përgjegjëse”.
NetChoice, një shoqatë tregtare që përfshin platforma të mëdha teknologjike, e quajti urdhrin ekzekutiv një “listë dëshirash” që do të përfundonte duke mbytur kompanitë dhe konkurrentët e rinj nga hyrja në treg dhe duke zgjeruar në masë të madhe fuqinë e qeverisë federale mbi inovacionin amerikan.
Urdhri i ri shkon përtej angazhimeve vullnetare të bëra në fillim të këtij viti nga kompanitë e AI si OpenAI, Alphabet dhe Meta Platforms, të cilat u zotuan të kontrollonin përmbajtjen e krijuar nga AI për ta bërë teknologjinë më të sigurt.
Rregullatorët po përpiqen të hartojnë rregulla që do të rregullojnë përdorimin e inteligjencës artificiale gjenetike ose gjeneruese.
Në mars, Elon Musk dhe të tjerë kërkuan një moratorium në zhvillimin e softuerit më të fortë se GPT-4 i OpenAI, duke përmendur rreziqe të mundshme për shoqërinë.
Në një seancë dëgjimore në Kongres, krijuesi i ChatGPT Sam Altman tha se ai favorizon një kuadër rregullator për AI, mundësisht në një nivel ndërkombëtar. “E di që duket naive të sugjerosh diçka të tillë, duket shumë e vështirë për t’u arritur, por ka precedentë,” shpjegoi ai, duke përmendur shembullin e Agjencisë Ndërkombëtare të Energjisë Atomike (IAEA).
Në prillin e kaluar në margjinat e një konference të Ministrave të Teknologjisë Dixhitale të vendeve anëtare të G7 në qytetin Takasaki, Japoni, Zëvendëspresidentja e Komisionit, Margrethe Vestager, propozoi masa legjislative për përdorimi i të gjitha mjeteve të AI.
