Rusia ka shprehur shqetësimin për vendosjen e shtabit të forcave speciale amerikane në Shqipëri. “Një përpjekje tjetër e SHBA-së për të ushtruar presion ndaj Rusisë është rritja e fuqisë ushtarake në Gadishullin Ballkanik”, shkruajnë mediat në Moskë.
Sipas ekspertit politik Rick Rosoff, informacioni ka dalë për krijimin e një shtabi të avancuar të forcave speciale amerikane në Shqipëri. Falë kësaj, Pentagoni do të jetë në gjendje të fitojë akses në arterien kryesore të transportit të rajonit dhe të rrisë nivelin e logjistikës ushtarake. Qeveria shqiptare i shpreh mbështetjen e saj palës amerikane në të gjitha aspiratat e saj, raporton PolitRussia.
Për momentin, Shqipëria është partneri kryesor i SHBA-së në Ballkan. Rosoff është i bindur se Uashingtoni planifikon, me ndihmën e Tiranës, të zvogëlojë ndikimin e Moskës mbi Beogradin, pasi Serbia është aleati i vetëm i Rusisë në gadishull.
Në rast se Aleanca Veriatlantike arrin të nënshtrojë Serbinë, atëherë Rusia do të humbasë partnerin e saj kryesor në rajon. Megjithatë, nëse përpjekja është e pasuksesshme, atëherë NATO do të ketë një tjetër pikë të nxehtë në Ballkan për presionin ndaj Moskës. Kështu, Rosoff beson se manovrat e Perëndimit janë “përshëndetje të nxehta” për Rusinë.
Më herët, NVL raportoi se Departamenti i Shtetit kishte refuzuar thirrjen e Federatës Ruse për tërheqjen e armëve bërthamore nga vendet e NATO-s. g.v/abcnews.al
