Liverpooli dhe Arsenali zhvilluan një ndeshje spektakolare në Carabao Cup. Dueli përfundoi 5-5 dhe fati i penalltive i buzëqeshi djemve të Jurgen Klopp. “The Reds” u kualifikuan më tej dhe do të ndeshen me Aston Villën në çerekfinale, ndeshje që është programuar të zhvillohet me datë 17 dhjetor.
Trajneri i Liverpoolit ka reaguar ashpër në lidhje me kalendarin e këtij kompeticioni, teksa kampionët në fuqi të Evropës do të marrin pjesë në Botërorin për klube, që zhvillohet nga 11-22 dhjetor në Katar.
“Nëse nuk gjejnë datën e duhur për ne, nuk do të luajmë në turin e ardhshëm dhe kundërshtari do të kualifikohet për në raundin pasardhës. Nuk e kam bërë unë kalendarin, i takon personave përgjegjës të kujdesen për këtë çështje.
FIFA na ka lajmëruar për Botërorin për klube dhe ne do të marrim pjesë. Nuk mund të mungojmë as në kampionat. Më pas është Carabao Cup, të cilën duam ta luajmë, por nuk duam që ndeshja radhës në këtë kompeticion të luhet natën e Krishtlindjes në orën 3 të mëngjesit.
Dikush duhet ta zgjidhë këtë problem, nuk mund të jemi ne viktimat e këtij sistemi. Problemi i kalendarit është injoruar deri tani, besoj se shumica e tifozëve po bënin tifo për Arsenalin nga TV, më vjen shumë keq“, përfundon trajneri gjerman i “The Reds”. /abcnews.al
