Loading ...
SHBA dhe Arabia Saudite kanë nënshkruar një marrëveshje historike që i hap rrugën mbretërisë së Gjirit për zhvillimin e një programi bërthamor civil. Marrëveshja, e cilësuar si një “marrëveshje paqësore për bashkëpunim bërthamor”, do t’u mundësojë kompanive amerikane një rol të rëndësishëm në programin saudit të energjisë bërthamore, njoftoi Departamenti Amerikan i Energjisë.
Sipas autoriteteve amerikane, marrëveshja mund t’i lejojë Arabisë Saudite që në të ardhmen të pasurojë uranium. Ky material mund të përdoret si lëndë djegëse për prodhimin e energjisë në termocentrale bërthamore, por në nivele të larta pasurimi mund të përdoret edhe për prodhimin e armëve bërthamore.
Departamenti Amerikan i Energjisë bëri të ditur se, krahas marrëveshjes për bashkëpunimin bërthamor, është nënshkruar edhe një marrëveshje dypalëshe për masat mbrojtëse dhe kontrollin e materialeve bërthamore.
“Së bashku, këto dy marrëveshje krijojnë bazën ligjore për një partneritet shumëmiliardë dollarësh, me kohëzgjatje disa dekadash, që mbështet objektivat ekonomike dhe strategjike të të dy vendeve, duke përfshirë edhe mospërhapjen e armëve bërthamore”, thuhet në deklaratën e Departamentit Amerikan të Energjisë.
Edhe qeveria saudite e përshëndeti marrëveshjen, duke theksuar se ajo përfaqëson një zgjerim të bashkëpunimit ekzistues mes dy vendeve në sektorin e energjisë./abcnews.al
