Autoritetet amerikane kanë zbuluar se masakra në Florida mund të ishte parandaluar. Sherifi i zonës bëri me dije se një oficer i caktuar për të ruajtur sigurinë në godinë nuk kishte ndërhyrë edhe pse ndodhej aty gjatë të shtënave.
Detaje shokuese kanë dalë në dritë, sa i përket masakrës në një gjimnaz në Shtetet e Bashkuara. Një officer i armatosur, i cili ishte caktuar të qëndronte në shkollën e mesme në Florida ku adoleshenti Nikolas Crus vrau me armë zjarri 17 persona javën e kaluar, ishte jashtë ndërtesës gjatë të shtënave dhe nuk ndërhyri. Kjo është konfirmuar nga zyra e sherifit lokal. “Oficeri Scot Peterson ka dhënë dorëheqjen pasi u pezullua”, bëri me dije Sherifi i zonës, Scott Israel. “Jam I shkatërruar, ai nuk hyri kurrë Brenda”, shtoi më tej ai.
Sherifi Isral nënvizoi se është verifikuar me video që oficeri Peterson ishte në kampus, i armatosur dhe me uniform, 90 sekonda pasi filluan të shtënat dhe ka qëndruar jashtë për 4 minuta. Sulmi në total ka zgjatur 6 minuta. I pyetur se çfarë duhej të bënte oficeri, Israel u përgjigj: “Duhej të hynte brenda, të lokalizonte agresorin dhe ta vriste atë”. Oficeri operonte në shkollën “Marjory Stoneman Douglas”, që prej 2009-ës.
Peterson ende nuk ka komentur lidhur me akuzat dhe sherifi i zonës bën me dije se ai nuk ka dhënë asnjë arsye përse nuk hyri në ndërtesë ndërsa agresori gjendej aty. Gjithashtu nuk është e qartë nëse ndaj tij do të ketë proces gjyqësor. Ky detaj i rëndësishëm vjen pas njoftimit të presidentit amerikan Donald Trump, i cili kërkon që të armatosen mësuesit, në mënyrë që të parandalojnë masakra të tilla në shkolla. Kjo nismë është mbështetur edhe nga Shoqata Kombëtare Amerikane e Armëve “NRA”.
Ndërkohë, ka pasur shqetësime edhe për sistemin e kamerave të sigurisë së shkollës së mesme dhe për injorimin e paralajmërimeve për Nikolas Cruz. Kamerat kanë shfaqur adoleshentin në një vend në të cilin ai nuk ishte dhe kjo ka bërë që të vonojë përgjigjen e forcave të sigurisë. Gjithashtu në 2016 dhe 2017 ka pasur shqetësime për Crus, përfshirë një që paralajmëronte se po planifikonte një sulm në shkollë. /abcnews.al
