Shtëpia e Bardhë i ka bërë thirrje Iranit që të lirojë menjëherë anijen që kapi pranë ngushticës së Hormuzit.
Anija është identifikuar si MSC Aries dhe u nis nga një port në Emiratet e Bashkuara Arabe, shkruan Al Jazeera.
“Ne i bëjmë thirrje Iranit të lirojë menjëherë anijen dhe ekuipazhin e saj ndërkombëtar. Kapja e një anijeje civile pa provokim është një shkelje e hapur e ligjit ndërkombëtar dhe një akt piraterie nga Korpusi i Gardës Revolucionare Islamike”, tha zëdhënësja e Këshillit të Sigurisë Kombëtare Adrienne Watson.
Izraeli ka kërkuar nga Bashkimi Evropian që të vendosë sanksione ndaj Iranit dhe të shpallë organizatë terroriste Gardën Revolucionare të Iranit.
Ndërkaq, Shtetet e Bashkuara të Amerikës kanë vendosur anije luftarake në pozicione për të mbrojtur jo vetëm Izraelin, por forcat e veta në Lindjen e Mesme, mes shqetësimeve në rritje se Irani mund të nisë një sulm të drejtpërdrejtë ndaj shtetit hebre./abcnews.al
