Producenti i Hollivudit, Harvi Uajnstin, i cili është përfshirë në skandalin e ngacmimeve seksuale, është sulmuar në një restorant në Arizona. Një i ri e ka goditur atë pasi nuk ka pranuar të dilte në fotografi.
Disa ditë pas protestës së femrave kundër ngacmimeve seksuale në ceremoninë e ndarjes së çmimeve “Golden Globes”, Harvi Uajnstin është rikthyer në qendër të vëmendjes përsëri. Por këtë radhë jo për ndonjë femër që e akuzon. Producenti hollivudian është sulmuar nga një i ri. E gjithë skena është filmuar dhe publikuar nga mediat amerikane.
Imazhet janë regjistruar mbrëmjen e së martës në një restorant në Arizonë. Uajnstin sapo kishte dalë nga lokali kur një person i është afruar dhe duke e goditur në fëtyrë ai e ofendon.
Ndërkohë, mediat amerikane kanë zbuluar të gjithë prapaskenën e sherrit. Mësohet se fillimisht i riu i kishte kërkuar të dilte në fotografi me 65-vjeçarin, i cili akuzohet nga mbi 50 aktore dhe nëpunës se i ka ngacmuar seksualisht. Por përgjigja e Uajnstin ishte negative. Kjo ka bërë që i riu me emrin Stiv të nervozohej.
Por ai nuk ka bërë asnjë veprim brenda restorantit. Stiv ka pritur daljen e producentit që ta sulmonte. Vetë autori i kësaj ngjarje ka pranuar se në momentin që ka goditur Uajnstin ishte në gjendje të dehur./abcnews.al
