12 persona janë arrestuar dhe 4 të tjerë janë shpallur në kërkim, të dyshuar si pjestarë të një grupi kriminal që trafikonte kanabis sativa, nga Saranda në Greqi.
Grupi drejtohej nga Ajaz Lila, 21 vjeç nga Shalësi i Konispolit, i njohur me pseudonimin “Babi”. Lila ishte dënuar më parë, për trafik të lëndëve narkotike. Sipas policisë pjestarët e grupit kishin detyra të caktuara dhe organizonin transportin e lëndës narkotike nga Tepelena e Gjirokastra, në drejtim të zonave kufitare të Konispolit.
Bimët narkotike dyshohet se magazinoheshin në disa ambiente në zonën pranë kufirit, e më pas trafikoheshin drejt shtetit grek.
Mësohet se hetimet po vijojnë edhe për persona të tjerë. Përveç personave të vënë në pranga në Shqipëri, të arrestuar ka edhe në shtetin grek.
Njoftimi i Policisë Sarandë
Goditet një grup kriminal në fushën e narkotikëve !
Arrestohen 12 shtetas si dhe shpallen në kërkim 4 të tjerë !
Sekuestrohen 9 automjete ndër to 5 automjete luksi !
Policia e Sarandës në bashkëpunim me Prokurorinë e Sarandës, kanë ndjekur një hetim proaktiv prej disa kohësh, për goditjen e një grupi kriminal në fushën e narkotikëve, të cilën e kanë finalizuar me sukses.
Në kuadër të këtij hetimi proaktiv Policia e Sarandës sëbashku me Prokurorinë Sarandë dhe në bashkëpunim me Forcën Operacionale të Drejtorisë së Përgjithshme të Policisë së Shtetit, DVP.Gjirokastër, dhe Policinë Kufitare Sarandë, kanë zhvilluar një operacion të koduar ”Piramida”, ku si rezultat kanë kapur dhe arrestuar shtetasit:
- Altin Sakaj, 36 vjeç, banues në fshatin Vrinë, Konispol, (i cili është kapur në flagrancë me mjetin me targa AA 931 IK, duke transportuar 18 kg lëndë narkotike kanabis).
- Ajaz Lile, 21 vjeç, banues në fshatin Shalës, Konispol, (i dënuar më parë për trafik të lëndëve narkotike , i ndaluar me pseudonimin “babi”, si organizator i grupit).
- Armando Koçiu, 29 vjeç, banues në Sarandë, (organizonte punën për gjetjen e lendës narkotike).
- Afron Halili, 22 vjeç, banues në fshatin Ninat, Konispol, (bëntë magazinimin e lëndës narkotike).
- Kastriot Muka, 32 vjeç, banues në Tepelenë, (posedues i lëndës narkotike).
- Enea Duro, 22 vjeç, banues në Sarandë, (transportues i lëndës narkotike).
- Marjo Zybo, 28 vjeç, banues në Sarandë, (transportues i lëndës narkotike).
- Fatjon Dule, 25 vjeç, banues në Konispol, (transportues i lëndës narkotike).
- Emilio Mehmeti, 28 vjeç, banues në Sarandë, (kontrollues i rrugës nga do kalonte lënda narkotike).
- Tori Ruci, 42 vjeç, banues në Sarandë, (financues për blerjen e lëndës narkotike).
- Eristjan Bejko, 21 vjeç, banues në Gjirokastër, (magazinues i lëndës narkotike).
- Osman Halili, 52 vjeç, banues në fshatin Ninat, Konispol, (ruante ambjentin ku magazinohej lënda narkotike).
Si dhe u bë shpallja në kërkim i shtetasve:
– E.V., transportues i lëndës narkotike nga fshati Shalës në drejtim të kufirit të gjelbër.
– R.H., transportues i lëndës narkotike nga fshati Shalës në drejtim të kufirit të gjelbër.
– F.(D.).D., transportues nga kufiri i Gjelbër drejt shtetait Grek.
– M.D., kontrollues i rrugës për kalimin e lëndës narkotike.
Shtetasit e mësipërm në mënyrë periodike, sipas një zinxhiri funksional të dyshuar kriminal, kanë organizuar transportin e lëndës narkotike nga rrethet Tepelenë dhe Gjirokastër në drejtim të zonave kufitare të Bashkisë Konispol, të cilën e magazinonin në disa ambjente në zonën pranë kufirit e më pas organizonin trafikimin e saj drejt shtetit Grek tek persona për të cilët po zhvillohen hetime.
Nga hetimet e kryera ka rezultuar se këta shtetas në periudha të ndryshme kohore kanë trafikuar lëndë narkotike kanabisi drejtim shtetit Grek., në bashkëpunim me të tjerë shtetas të cilët janë kapur e ndaluar në shtetin Grek më datë 30.01.2018, si dhe në të tjera raste për të cilat për arsye hetimi nuk bëhen të ditura.
Policia ka sekuestruar në cilësine e provës materiale:
9 automjete ndër to 5 mjete luksi, lendë narkotike kanabisi dhe 21 aparate celular.
Shtetasit e mësipërm akuzohen për veprat penale ”Grup i strukturuar kriminal” dhe ”Trafikimi i lëndëve narkotikëve”, të parashikuar nga neni 333/a dhe 283/a/2 të Kodit Penal. /abcnews.al
