Studiuesi Sadik Bejko është i mendimit se dokumentet e publikuara nga Auron Tare për Camaj dhe Koliqin duhen parë si një përpjekje e shkrimtarëve për jetë a vdekje, e ndarjes mes dy botëve aso kohe, mes perëndimit dhe lindjes.
Qëndrimi antikomunist i tyre, u pagua shtrenjtë, nga familjarët e tyre, thekson Bejko.
“Ai duhet parë si një nismë për të parë anën e pasme në biografinë e disa shkrimtarëve që kanë jetuar në kushte të tjera politike, të politkës së ndarjes për jetë a vdekje midis bllokut perëndimor, kapitalist dhe bllokut lindor, komunist. Në këtë periudhë shkrimtarët janë përdorur”, u shpreh ai.
Historitë policeske, apo spiunazhi, nuk mund të dëmtojnë asesi veprën e tyre.
Mënyra e të shkruarit, të këtij studimi, sipas Bejkos është si skup, por studiuesit duhet ta shohin e lexojnë me gjakftohtësi.
“Janë histori që kanë vlerë, ndonjëherë kanë vlerë edhe të skup-it. Një studiues e sheh me gjakftohtësi, atij i intereson mënyra se si kanë krijuar dhe punuar këta njerëz në kushte të tilla”, shprehet ai.
Sadik Bejko thotë se veprimtaria e tyre atdhetare dhe letrare është e pamohueshme. Koliqi është misionari i hapjes së shkollave shqipe në Kosovë.
