Kryetari i Bashkisë së Kukësit Bashkim Shehu ka kërkuar që rruga Kukës- Shishtavec të merret nën përgjegjësinë e Autoritetit Rrugor, pasi ajo është dëmtuar dhe Bashkia nuk ka para për ta mirëmbajtur.
Është destinacion turistik. Por rruga po e penalizon Shishtavecin. Një vit më parë përfundoi se ndërtuari dhe kushtoi 28 milionë dollarë. Por pamjet tregojnë shkarje inertesh dhe prani të dherave. Trupi i rrugës ka çeduar në disa zona të saj. Vende – vende ka dëmtime serioze.
“Rruga Kukës-Shishtavec, më keq s’ka ku të shkojë, ca turizmi me këto rrugë të këqija. Rrezikshmëria është shumë e lartë”
Bashkia e Kukësit edhe pse herë pas here e pastron rrugën, është tërësisht e pafuqishme, qoftë financiarisht, por edhe nga ana e mekanikës për të bërë të mundur mirëmbajtjen.
Kryebashkiaku i Kukësit Bashkim Shehu kërkon kalimin e rrugës nën përgjegjësinë e Autoritetit Kombëtar.
Bashkim Shehu: “Mirëmbajtja nga ana financiare është e pamundur, ky është një apel për ndihmë, pasi është një rrugë strategjike për zhvillimin e turizmit”.
Rruga Kukës-Shishtavec, deri në vitin 2015, ka qenë në inventarin e rrugëve kombëtare, por për shkak të financimit ajo i kaloi njësive vendore.
Me përfundimin e financimit sërish i është kërkuar qeverisë të marrë vendim për transferimin, por ende nuk ka një përgjigje dhe segmenti nuk ka mirëmbajtje./ abcnews.al
