Shtatë deputetë të Kuvendit të Shqipërisë kërkuan interpelancë urgjente me Ministren e Arsimit, Sportit dhe Rinisë Besa Shahini për rritjen e notës mesatarë për studimet e larta. Ky vendim i qeverisë sipas deputetëve penalizon maturantët ndërsa sipas ministres rrit cilësinë në arsim.
Rritja e notës mesatare për pranimet në universitet nxiti shtatë deputetë të Kuvendit t’i kërkonin shpjegime Ministres së Arsimit, Sportit dhe Rinisë Besa Shahini.
“Si mund të miratohet një vendim dy javë përpara se të mbarojë matura, duke përcaktuar mesataren e një procesi që ka filluar tre vite më përpara. A nuk do të ishte më e drejtë që ta vendosnit këtë vendim vlefshmërie që nga viti i parë i studimeve 2019-2020”?
Ministrja e Arsimit, Sportit dhe Rinisë doli në foltore për të treguar se vendimi vjen pas analizës së kryer në cikle të ndryshme të arsimit.
“Do të sigurohemi që vetëm më të mirët do të bëhen mësues, do të sigurohemi se do të rritet cilësia e arsimit të lartë si nga ana e universiteti, si nga ana e prurjeve të studentëve”.
Përgjigja nuk kënaqi deputetët që kërkuan interpelancën urgjente me ministren Shahini.
“Unë e shtrova me dashamirësi dhe me një ton tjetër gjatë gjithë pyetjeve pa dashur t’ju akuzoj për agjë në ndryshim nga përgjigjet tani ishte “a jeni ju të predispozuar ta shtyni këtë vendim të paktën për një vit” që ata të kenë një vit mundësi që ta përmirësojnë mesataren, jo si këta që ikën. Ju mesa duket nuk e zutë fare në gojë. Nuk dhatë asnjë përgjigje, po, jo, ndoshta”.
Ndërsa qeveria nuk tërhiqet në vendimin që ka marrë.
“Ka filluar të zbatohet qysh në vitin 2016 me notën mesatare 6, në vitin 2018 me notën 7 për mësuesi. Atëherë kemi folur publikisht, në të gjitha universitetit, që do të shkojmë tutje në studimet e mësuesisë me 7.5 dhe ashtu siç ju thashë sot do të shkojmë në 8”.
Maturantët që duan të ndjekin studimet e larta këtë vit akademik në programet bachelor gjatë viteve të gjimnazit duhet të kenë arritur mesatare të notave të paktën 6.5. Nëse zgjedhin degët e mësuesisë mesatarja duhet të jetë minimum 7.5 ndërsa për mjekësinë 8.5./ABC News Albania 24/7
