Loading ...Në Mirditë, reshjet e ditëve të fundit dhe prurjet e lumenjve kanë shkaktuar gërryerje të tokës dhe dëme në infrastrukturë. Në Zall-Donaj, Lumi Fan i Vogël ka rrëzuar përsëri shtyllat elektrike duke lënë pa energji fshatrat Ndërfanë, Gëziq, Kalanjan dhe Cekaj. Autoritetet paralajmërojnë se avancimi i gërryerjes rrezikon banesat dhe rrugët lokale, ndërsa tubacioni i ujësjellësit në Rrëshen ka dalë në sipërfaqe dhe mund të këputet.
Emergjencat civile po punojnë pa ndërprerje, me kamionë, eskavatorë dhe punonjës në terren për përforcimin e argjinaturës dhe pastrimin e zonave të prekura. Furnizimi me ujë të pijshëm po vazhdon normalisht, ndërsa energjia elektrike rikuperohet gradualisht.
Në bashkitë Lezhë dhe Kurbin, situata paraqitet më e qetë. Nivel i ujërave ka rënë, ndërsa grupet e punës vijojnë pastrimin e rrugëve, largimin e aluvioneve dhe verifikimin e dëmeve. Në zonat kodrinore dhe malore vijon të mbetet problem fenomeni i rrëshqitjes së tokës, ndaj autoritetet iu bëjnë apel banorëve të tregojnë kujdes.
