Loading ...KUKËS- Rexhep Kovaçi, artist i këngës lirike dhe folkut shqiptar është në pension, por çdo mbrëmje punon me nipin e tij për t’ia përcjellë mjeshtërinë e çiftelisë dhe artin e të kënduarit.
Për të marrë drejtimin si artist, për mjeshtrin Rexhep Kovaçi janë vetëm dy rrugë; dhuntia dhe mësimi. Ka një lidhje të ngushtë shpirtërore me çiftelinë.
Thotë se rrugëtimin e tij me muzikën e ka nisur që kur ishte fëmijë në bankat e shkollës dhe nuk e ka ndërprerë kurrë.
Çiftelisë nuk I është ndarë kurrë, pasi ky instrument e ka bërë të njohur jo vetëm brenda vendit, por edhe në shumë shtete të botës ku ka dhënë koncerte.
Ka marrë pjesë në të gjitha festivalet folklorike dhe e ka përfaqësuar Shqipërinë në shumë evente ndërkombëtare.
Nuk është vetëm një artist autodidakt, por ka punuar me kompozitorë dhe ikona të muzikës shqiptare.
Ajo çfarë e veçon si këngëtar Rexhepin është kënga e Çobanit, një prej këngëve burimore e baladë e krahinës së Lumës, e krahasuar me bareshën e Pagarushës.
Në repertorin e tij rapsodik numëron më shumë se 180 këngë. Tre këngët e tij më të njohura kanë ngritur peshë një komb të tërë për shkak të motiveve patriotike.
Rexhepi është rapsod e mjeshtër i madh i këngës, por në jetën e tij ka punuar në disa sektorë.
Në faqen e murit ka vendosur dhjetëra certifikata, mirënjohje e çmime të akorduara në dekada./abcnews.al
