Anëtarët e Komisionit të Rithemelimit kanë mbërritur këtë mesditë sërish në selinë e Partisë Demokratike. Përfaqësuesit e këtij komisioni, që një ditë më parë morën nga gjykata certifikimin e Kuvendit të 11 Dhjetorit kanë mbërritur sërish sot në seli, sipas tyre për të kryer një inspektim.
Deputeti Flamur Noka tha se do të ç’blindojnë godinën. “Ekspertët na thanë që do kohë të ç’bunkerizohet selia”, theksoi ai.
Lexo edhe: Noka: Basha një nga kolegët tanë, tani s’ka më ndarje por vetëm bashkim
Duke iu përgjigjur pyetjeve të gazetarëve, Noka theksoi se pas heqjes së blindave kjo parti do të jetë më e hapur dhe më e bashkuar. Demokrati artikuloi se tashmë beteja e tyre është me regjimin e Edi Ramës dhe jo me njëri-tjetrin.
“I pari ç’bunkerizimi i PD, i dytë që është rrugën që kemi nga demokrati më i thjeshti deri te deputetët e kemi së bashku. Pas ç’bunkerizimit të partisë kjo seli do ti rikthehet normalitetit. Do të jetë e hapur për çdo demokrat. Kjo periudhë do ti përkasë së shkuarës. Nuk do të dëshiroja as ta kujtonim këtë situatë. Do të shohim përpara të gjithë së bashku sepse nuk mund të rrimë nën hijet e bunkerit, as i mentaliteteve të vjetra. Beteja do të jetë me regjimin, për ta rrëzuar një regjim që po iu pi gjakun shqiptarëve”, shtoi ai. g.v/abcnews.al
