Nga Berati ku pa nga afër investimet e bëra në disa zona, kryeministri Edi Rama thumboi Partinë Demokratike duke deklaruar se ajo do humbasë thellë në këto zgjedhje pasi PS i ka marrë asetin më të çmuar, Ervin Demon.
“Një nga arsyet që do humbë thellë PD në Berat është se ia morën asetin më të çmuar Demon. Të lanë nuk të identifikuan. Tak erdhe”, tha Rama.
Nga ana tjetër një tjetër “blerje” e socialistëve nga kampi kundërshtar, kësaj radhe i LSI, Nasip Naço u shfaq krah kryeministrit duke treguar arsyen pse i është bashkuar PS.
“Tashmë Berati është bërë një kantier ndërtimi, është realitet. Unë jam bërë pjesë e skuadrës me premtimin tuaj se do investoni tre herë më shumë se ç është bërë në këto vite. Unë besoj se ju e mbani fjalën se Berati meriton më shumë se kaq. Syri, veshët dhe vëmendja juaj do jenë për Beratin”, u shpreh Naço.
Rama theksoi se për të arritur te investimet e premtuara duhet mbështetje maksimale më 25 Prill. “Ka një moment që është 25 Prilli që ne të marrin në Berat gjithë mbështetjen e fuqishme dhe pastaj ta kthejmë në një rritje të fuqishme të investimeve dhe vëmendjes”, deklaroi Rama./mv.abcnews.al
