Gjatë një inspektimi në një fabrikë bimësh medicinale në Dushnik të Beratit, kryeministri Rama deklaroi se qeveria do të mbështesë të gjithë sipërmarrësit me programe te posaçme biznesi. Rama tha se qeveria ka vullnetin të ndihmojë bizneset me fonde në mënyrë që të rrisë punësimin në vend.
Kryeministri Edi Rama vizitoi një fabrikë bimësh medicinale në Berat, e cila ka të punësuar 60 punëtorë dhe 2700 fermerë të angazhuar në mbledhjen dhe përpunimin e këtyre bimëve.
Në materialin e shpërndarë nga zyra e shtypit, Rama premtoi se sipërmarrësit do të kenë gjithë vëmendjen e qeverisë, e cila do të mbështesë përmes programeve të posaçme idetë e tyre inovatore.
Edi Rama: Ne e kemi të gjithë vullnetin. Mundësitë e reja janë të jashtëzakonshme, sepse bëhet fjalë për një volum fondesh shumë të madh, por siç e kemi mësuar nga jeta me perëndimin ku ti eksporton, duhen letrat mirë të kopsitura, idetë e qarta, strategjia e qartë dhe në fund paratë janë, po para që “hajde se po i hedhim.
Edhe sipërmarrësi i fabrikës, duke folur për projektin IPARD që u vjen në mbështetje sipërmarrësve, tregon se mundësitë për të rritur punësimin janë të mëdha.
Sipërmarrësi: Aty mund të shtojmë edhe 60 punëtorë të tjerë, sepse do të shtojmë edhe frutat, pasi projekti që kemi bërë, nuk lejon që frutat të jenë bashkë me bimët medicinale. Edhe rrogat do t’i rrisim. Por duhet të bëjmë investime që të zgjerojmë hapësirat, pasi janë shumë të kufizuara.
Sipërmarrësi i fabrikës së bimëve medicinale pohoi se gjatë tre viteve të fundit, lehtësitë fiskale nga qeveria kanë qenë të shumta, duke ndikuar në përmirësimin e performancës së biznesit./abcnews.al
