Rama i përgjigjet akuzave të qyetatarit: Ballë për ballë me vulgaritetin e mosozotshëm! Algoritmi është vënë në funksion të së keqes

Përmes një reagimi të ashpër në rrjetet sociale, Kryeministri Edi Rama ka adresuar komentet e një qytetari, duke e cilësuar gjuhën e përdorur si një shfaqje të “vulgaritetit të mosozotshëm”. Ndërsa shprehu vlerësim për qytetarët që protestojnë sinqerisht për t’u dëgjuar, kreu i qeverisë sulmoi ashpër reagimet e profileve false, të cilat i emërtoi si “llumi mbi ujin e pastër të protestës”.

Rama paralajmëroi se pas kësaj furie komentesh fshihet një algoritëm i vënë në funksion të së keqes dhe një megamanipulim digjital. Në mbyllje të reagimit të tij, ai deklaroi se së shpejti do të ekspozohen me prova dhe fakte edhe grupet e huaja që qëndrojnë pas këtij sulmi virtual.

Rama i përgjigjet akuzave të qyetatarit: Ballë për ballë me vulgaritetin e mosozotshëm! Algoritmi është vënë në funksion të së keqes

“Ballë për ballë me vulgaritetin e mosozotshëm të një zëdhënësi të “Shqipërisë së Re”.

Dhe një fjalë në fund për njerëzit që sinqerisht besojnë tek protesta sepse duan të dëgjohen.

***furia e vulgariteteve me profile fallco tek komentet më poshtë do të tregojë përsëri, se si në çdo postim që i bie ndesh kësaj shtrese llumi mbi ujin e pastër të protestës, Algoritmi është vënë në funksion të së keqes – nuk do mbeten pa u ekspozuar me prova e fakte edhe grupet e huaja që janë mbrapa këtij megamanipulimi digjital”, ka shkruar Rama.

Reagimi i plotë:

-O Rame, o ndyrsirë, kemi ruajtur etikën gjithë këtë kohë, po të shkruash në “Financial Times”, t’i thuash shqiptarëve “f**k you”. Kush je ti mor plehrë?

Kryeministri Edi Rama: Më çuan videon e këtij djalit dhe, përpara se të dëgjoja sharjet, ndjeva sëkëlldinë e tij. Pyeta për të. Demokrat 24 karat, nip i një demokrati të respektuar, profesionist me të cilin më lidh respekti i ndërsjellë. Fakti është se unë nuk ua kam thënë shqiptarëve kurrsesi atë fjalë. Duket qartë edhe në artikull. Kur gazetari më ka pyetur si u përgjigjesh atyre që të akuzojnë se je kumbari i qeverisë, i thashë shkurt fjalën që meriton kush në fakt më akuzon papushim, vite e vite, dhe s’ka lënë dy gurë bashkë për të më baltosur dhe varrosur, por kurrë asnjë provë.Nga një orë bisedë e lirë, ai zgjodhi pikërisht atë fjali. Po unë nuk jam pishman.

-A kupton që unë që flas, jam ngritur kur babai im i ndjerë, që ishte nga njerëzit më të nderuar e më të njohur në Tiranë e Shqipëri, ndërroi jetë në Vjenë nga kanceri i mëlçisë, sepse mjekësia, në nivelin ku e ke lënë ti, e kuronte për ulçer, o plehrë.

Kryeministri Edi Rama: Më erdhi sinqerisht keq dhe, përpara se sa të përgjigjesha, u interesova për rastin. I ndjeri babai i këtij djali, nuk ka shkelur asnjëherë në asnjë spital publik të Shqipërisë, por fillimisht është kuruar në një spital privat, diku këtu e dhjetë vjet më parë. Djali ka shkuar larg bashkë me valën e revolucionit imagjinar të bulevardit, urrejtja politike dhe furia e algoritmit e kanë bërë të më fajësojë mua publikisht. Pas dhjetë vjetësh, kur i ati nuk u shërua dot në Tiranë nga kanceri i mëlçisë dhe ndërroi jetë në Vjenë kthehet në skenë për tu përdorur si “mish për top”.

-Dhe si babai im, janë me mijëra shqiptarë që vuajnë, që bëjnë cirqe botës, sepse shëndetësia është në pikën ku ti e ke lënë në këto 13 vite qeverisje. Sepse i keni vjedhur të gjitha paratë.

Kryeministri Edi Rama: Këtu shkon edhe më tutje djali, i bën mijëra e mijëra shqiptarët që, sipas tij, vdesin rrugëve të botës, sepse këto 13 vite shëndetësinë e paskam kthyer unë në pikën e vdekjes, ndërkohë që transformimi i dekadës së fundit në shëndetësi është epokal, më i madh se i të gjitha viteve të mëparshme të mbledhura sëbashku, e këtë s’e them unë, por faktet, ndërsa unë them, po shëndetësia ka nevojë për shumë më shumë akoma.

-Dhe ti ke guxim t’i thuash popullit “fuck you”? Po populli ta ka thënë me kohë: ça t’kesh, ku t’i mbajë pragu derës. Mos e kruaj me popullin, mos i jep gojës. Ik një orë e më parë. Boll u talle me njerëzit. Boll i linçove njerëzit një nga një.

Kryeministri Edi Rama: Jo popullit, jo. Jo popullit, se as ky djali dhe as ata që u djeg ajo fjala pasi më akuzojnë e më shajnë si të dalë duarsh e mendsh, as nuk janë populli, as nuk flasin dot në emër të popullit sepse populli flet vetë, kur i vjen radha dhe ka folur kur ishte dita, do flasë përsëri kur t’i vijë dita. Ndërsa ata njerëzit një e nga një, askush nuk i ka linçuar, thjesht janë ekspozuar për tu çmaskuar me fakte si individë shoqërisht të rrezikshëm apo si manipulatorë të paskrupullt, jo me shpifje, jo sharje si këto llafet më të ulëta të rrugës që janë bërë tani norma e ditës dhe që në këtë rast turpërojnë edhe babain e ndjerë.

-Është e turpshme që një kryeministër ende në detyrë të nxjerrë ato video, ato foto të njerëzve privatë, që kanë një mijë halle.

Kryeministri Edi Rama: Asnjë video dhe asnjë foto private njerëzish privatë, por materiale publike individësh disafytyrësh që nuk kanë 1001 halle, por kanë axhenda lloj-lloj për të manipuluar publikun, duke gënjyer dhe besuar edhe vetë gënjeshtrat e tyre, se ashtu ato punë, njësoj si djali këtu.

-Ti i hip helikopterit, ti dhe familja jote. E kush janë njerëzit si puna jote, drejtuesit e shtetit i hipin avionit dhe kurohen jashtë. Kështu që mbylleni gojën. Të paktën mos kaloni në këtë gradë, sepse do e ktheni personale me çdo njeri që është aty.

Kryeministri Edi Rama: Kushedi me kë më ngatërron, por unë personalisht jam shtruar dy herë dhe kam bërë dy ndërhyrje në trupin tim në spitalin shtetëror, ndërkohë që familja ime kurrë, kurrë, kurrë s’ka përdorur as helikopterë, as avionë, as fonde të shtetit, as për hall e as për qejf, çdo udhëtim privat i yni është i paguar nga buxheti familjar, gjithmonë në ekonomik.

-Tani është momenti të japësh dorëheqjen dhe qytetarët ta marrin Shqipërinë në dorë, siç i takon, një Shqipëri pa korrupsion, ku qytetarët nuk duhet të shkojnë në çdo cep të botës të kurohen, sepse ti e ke lënë mjekësinë në këtë pikë.

Kryeministri Edi Rama: Jo, jo. Jo sepse unë jam i lidhur me një kontratë me tjetër kënd, që quhet populli sovran i Shqipërisë, me të cilin kam firmosur deri në 2029-ën dhe dua t’u siguroj të gjithë atyre që janë sinqerisht e nuk kane parti apo para nga pas për të yshtyr këtë protestë se unë nuk i ngatërroj shqetësimet, hallet e zemërimin e tyre me këto personazhe të padinjitetshme që turpërojnë mexhelisin tonë publik. Por, me të neutralizuar një të keqe shumë të madhe dhe me shumë koka që ka kapur për fyti protestën, padiskutim që unë do të kthehem drejt masës domethënëse të njerëzve, të njerëzve pavarësisht nga çfarë kahje vijnë që duan të dëgjohen dhe do t’u them se çfarë kam kuptuar nga e gjithë kjo nevojë e tyre për të protestuar dhe si mendoj unë se duhen adresuar ato që së brendshmi, sinqerisht i thërrasin njerëzit drejt protestës, drejt nevojës për tu dëgjuar dhe po ashtu drejt admirimit për ata që protestojnë edhe në emër të tyre pikërisht për arsye të kësaj nevoje.