Kryeministri Edi Rama dhe ministri i Ekonomisë, Kulturës dhe Inovacionit, Blendi Gonxhja janë të pranishëm në eventin HangArt në ambientet e ministrisë së Kulturës.
Në aktivitet u prezantua dhe nisja e edicionit të katërt të Javëve Kulturore Ndërkombëtare CulturAlb, rrjeti i qendrave për promovimin e kulturës shqiptare në botë, programi Kombëtar i Granteve për Kulturën dhe Krijimtarinë si mbështetje për skenën e pavarur artistike.
Gjatë fjalës së tij, Rama tha se është rritur ndjeshëm buxheti mbi kulturën dhe se po punohet për një sërë skemash që t’ju vijnë në ndihmesë njerëzve të kulturës dhe skenës. Më tej, Rama u shpreh se Teatri Kombëtar do të jetë një fabrikë e vërtetë në të gjitha kuptimet.
“Pjesë e këtij qëllimi është edhe vetë organizimi i ri i ministrisë dhe kombinimi me një strukturë me ekonominë, inovacionin dhe kulturën. Kemi rritur ndjeshëm buxhetin dhe po punojm për një sërë skemash të reja që do i vijnë në shërbim njerëzve të kulturës dhe skenës në të gjitha fushat që mbulon ky hark i gjerë institucional. Dëshiroj t’ju them se do bëjmë një përpjeke të posaçme për të stimuluar edukimin e menaxherëve të kulturës.
Ka një hendek mes protagonistëve që janë të pjekur dhe me plot gjëra interesante për të ndarë me publikun dhe pjesës së menaxherimit të institucioneve të kulturës që te ne është e mangët. Pyetja e madhe është se si do të arrijmë që këto hapësira t’i kthejmë në hapësira begatie dhe pjellorie, këtu nuk është çështje e talenteve apo parave, por është çështje e mënyrës sesi këto hapësira administrohen. Teatri Kombëtar nuk do të jetë thjesht një destinacion me skenë të raskapitur, por është një fabrikë e vërtetë në të gjitha kuptimet.”
/ abcnews.al
/ abcnews.al
