Qeveria e Kosovës ka miratuar sot masat e reja kundër virusit Covid-19. Kështu, sipas masave të reja, ora policore do të fillojë nga ora 00:00 deri në ora 05:00, ndërsa gastronomia do të punojë deri në orën 23:00.
Masat si duket ndryshojnë edhe në kufi, pasi tashmë të gjithë atyre që do hyjnë në Kosovë do t’u kërkohet që të dëshmojnë se i kanë kryer dy doza të vaksinës anti-covid. Pra, kushti për dozën e tretë që u kundërshtua kryesisht nga qytetarët në Kukës por jo vetëm, është hequr.
Ata që kanë një dozë të vaksinës, duhet ta kenë edhe testin PCR. Do të lejohen të futen në Kosovë pa test PCR apo certifikatë vaksinimi edhe personat që e kanë kaluar COVID-19 në tre muajt e fundit.
Lehtësimi i masave është bërë i ditur përmes një konferencë të përbashkët për media nga kryeministri i Kosovës, Albin Kurti dhe ministri i Shëndetësisë, Rifat Latifi. Gjatë konferencës për media, Kurti ka thënë se masat e marra në këto dy javë kanë pasur sukses në ngadalësimin e rritjes së rasteve.
Rifat Latifi bëri gjithashtu të ditur se me vendimin e ri për masat anti-COVID hiqet detyrimi i mbajtjes së maskës në ambiente të jashtme.
VENDIMI I PLOTE:
Duke filluar prej datës 5 shkurt, çdo person i cili hyn në Republikën e Kosovës duhet të posedojë një nga dëshmitë e mëposhtme:
- Certifikatën e vaksinimit për vaksinimin e plotë me dy doza ose me një dozë të vaksinës Johnson & Johnson, që nuk ka kaluar më shumë se 12 muaj nga marrja e dozës së fundit;
- Certifikatën e vaksinimit me një dozë e shoqëruar me testin RT-PCR negativ për COVID-19, jo më i vjetër se 48 orë;
- Dëshmi se personi ka kaluar COVID-19 në 90 ditët e fundit (test RT-PCR pozitiv i lëshuar 21–90 ditët e fundit);
- Dëshmi se personi e ka marrë dozën e tretë/përforcuese.
- Dëshmi të testit RT-PCR negativ për COVID-19, jo më i vjetër se 48 orë.
Nga kërkesa për të poseduar ndonjërën nga dëshmitë sipas pikave të përmendura më lart përjashtohen:
Personat të cilët hyjnë në Kosovë përmes aeroportit apo përmes pikave kufitare tokësore dhe largohen nga Kosova (tranzit) brenda 3 orësh, përmes aeroportit ose pikave kufitare tokësore, me kusht që në hyrje të nënshkruajë deklaratën se do largohet nga Kosova brenda 3 orëve dhe që dalja në pikë kufitare të jetë e ndryshme nga hyrja;
Personat, të cilët punojnë si transportues profesionist (vozitës), me kusht që të respektojnë protokollin për transport ndërkombëtar për mbrojtje nga COVID-19;
Shtetasit e Republikës së Kosovës që kanë dalë jashtë Kosovës në 12 orët e fundit;
Qytetarët e huaj, të cilët kalojnë nëpër Kosovë përmes transportit të organizuar me autobus ose me linjë të rregullt ndërkombëtare, transit, me kusht që të nënshkruhet deklarata se do ta lëshojnë territorin e Kosovës brenda 5 orëve;
Diplomatët e huaj, të akredituar në Kosovë dhe pjesëtarët e trupave të KFOR;
Personat nën moshën 12-vjeçare;
Shtetasit e Republikës së Kosovës që nuk i kanë dy doza të vaksinës janë të detyruar të kryejnë karantinim shtëpiak, për një periudhë prej 7 ditësh që nga hyrja në territorin e Kosovës;
Personat me dëshmi mjekësore nga mjeku specialist i fushës përkatëse se kanë kundërindikacione dhe janë liruar nga detyrimi i vaksinimit.
Këta persona duhet të paraqesin testin RT-PCR negativ për COVID-19, të bërë jo më herët se 48 orë para nisjes (për udhëtarët që hyjnë në rrugë ajrore) ose 48 orë para mbërritjes në pikën kufitare (për ata që hyjnë në rrugë tokësore).
Personat të moshës 12-16 vjeç duhet të posedojnë testin RT-PCR negativ jo më të vjetër se 48 orë. /abcnews.al/
