Qeveria e Kosovës bën të detyrueshme mbajten e maskave në publik

schedule15:27 - 13 Korrik, 2020

schedule 15:27 - 13 Korrik, 2020

Qeveria e Kosovës ka vendosur që të bëjë të detyrueshme mbajtjen e maskave nga të gjithë qytetarët jashtë shtëpive të tyre.

Në mbledhjen e kësaj të hënë qeveria ka vendosur që të gjithë do të jenë të detyruar që të mbajnë maskën si një ndër masat kryesore për mbrojtjen ndaj koronavirusit.

“Vendimi i parë i miratuar në mbledhjen e sotme për ndërmarrjen e masave, me qëllim të parandalimit të përhapjes dhe kontrollit të infeksionit COVID-19 është për obligimin e të gjithë banorëve të Republikës së Kosovës që të bartin maskat për fytyrë në të gjitha aktivitetet jashtë shtëpive/banesave të tyre, si dhe të mbajnë distancë fizike prej 2m në ambiente të përbashkëta jashtë shtëpive/banesave të tyre.

Vendimi obligon gjithashtu që të gjitha institucionet publike dhe private të mbajnë dezinfektues për duar dhe maska për fytyrë në vende të qasshme, në hyrje të objektit, të cilat mund të shfrytëzohen nga punëtorët e institucioneve dhe vizitorët”, thuhet në vendimin e Qeverisë.

Po ashtu, listës së qyteteve që futen në karantinë nga ora 21:00 deri në orën 5:00 u janë shtuar edhe Mitrovica e Jugut, Gjilani, Fushë-Kosova dhe Shtërpca./abcnews.al