Loading ...
Ambasada shqiptare në Athinë i ka bërë thirrje qytetarëve të mos paraqiten në ambientet e saj deri në njoftim të dytë, pasi një punonjës i saj u konfirmua pozitiv me Covid-19.
Në njoftimin e saj ambasada thekson se është në pritje të daljes së rezultateve të testimeve të kryera nga punonjësit e saj, ndërsa brenda ditës së sotme do të merret vendimi nëse do të rikthehen në punë nga dita e nesërme.
“Ambasada e Republikës së Shqipërisë në Athinë, njofton të gjithë qytetarët për mbylljen e ambjenteve të Ambasadës në kushtet e marrjes së informacionit në orët e vona të ditës së djeshme për infektimin e një specialisti të Ambasadës, i cili pas kryerjes së testimit përkatës rezultoi pozitiv ndaj Covid-19, duke u detyruar kështu të ndërmarrin masa urgjente dhe ekstreme.
Gjithashtu, në Ambasadën e Republikës së Shqipërisë sistemi ka pësuar një defekt teknik, të cilin po zgjidhet dhe ndërkohë janë marrë masa të menjëhershme për dezinfektimin e të gjitha ambienteve të saj.
Për sa më lart, Ambasada e Republikës së Shqipërisë mbetet në pritje të të gjithë rezultateve të testimeve të kryera për Covid-19, të cilave konsujt dhe punonjësit e saj i janë nënshtruar, për t’ju rikthyer shërbimit sa më shpejt dhe të sigurt. Brenda pasdites së sotme të gjithë qytetarët do të njoftohen nëse Ambasada do të vijojë të qëndrojë e mbyllur edhe ditën e nesërme, apo do t’i rikthehet punës pandalur, edhe përtej orarit, si zakonisht.
Ambasada i bën thirrje qytetarëve të mos paraqiten pranë ambjenteve të saj dhe të respektojnë këtë njoftim duke mbrojtur në këtë mënyrë veten dhe të afërmit. Takimi i gjithësecilit do të spostohet në momentin më të afërt dhe të sigurtë.
Ministria për Evropën dhe Punët e Jashtme
Drejtoria e Diplomacisë Publike dhe Diasporës”, thuhet në njoftim./m.v. abcnews.al
