PSG, Reali, Liverpool, historia me Milan dhe Kupa e Botës, zbërthehet Mbappe

schedule16:35 - 24 Maj, 2022

schedule 16:35 - 24 Maj, 2022

Kylian Mbappe vazhdon të jetë në qendër të vëmendjes së mediave prej muajsh me radhë, tani edhe pse ka vendosur për të ardhmen e tij, përsëri diskutohet për të.

Sulmuesi francez vendosi të vazhdonte karrierën e tij në Francë, pasi rinovoi me PSG, teksa refuzoi ofertat e vazhdueshme të Real Madrid.

Por vetëm “Los Blancos” nuk ishin skuadra e vetme me të cilët ka komunikuar ylli i PSG-së, pasi dhe Liverpool ishte një kandidat për të transferuar Mbappe.

Për të gjithë ofertat për të ardhme e tij, nga lidhja e veçantë me Milan, dashuria e nënës për Liverpool, refuzimi i Realit, rinovimi me PSG dhe Kupa e Botës, sulmuesi francez është zbërthyer për “La Gazzetta dello Sport”.

“Kam folur me Liverpoolin sepse është klubi i preferuar i mamasë sime. Nuk e kuptoj pse ajo i mbështet Reds, ju duhet ta pyesni atë. Ata janë një klub i madh. I kisha takuar tashmë pesë vjet më parë kur luaja për Monacon. Kësaj radhe folëm shkurt, por në fund zgjedhja ishte mes Real Madridit dhe PSG-së. Të gjithë e dinë që doja të shkoja në Madrid verën e kaluar, sepse mendova se ishte zgjedhja e duhur”, ka deklaruar fillimisht Mbappe.

Një fotografi e Mbappes i veshur me një fanell të Milanit kur ishte fëmijë ishte bërë virale gjatë javëve të fundit, kështu që ai u pyet për mendimet e tij për kuqezinjtë, të cilët sapo kanë fituar Scudetton e 19-të në historinë e tyre.

“Lidhja ime me Milanin është e veçantë. Dadoja ime ishte italiane dhe kaloja shumë kohë me familjen e saj, ata të gjithë e mbështetën Milanin. Falë tyre, kam parë shumë ndeshje të Milanit dhe jam bërë tifoz. Unë thosha: nëse do të luaj ndonjëherë në Itali, do të jetë vetëm te Milani. Po të kisha thënë diçka ndryshe, do të më kishin vrarë. Mund të përgëzoj kuqezinjtë, atje janë shumë miq të mi francezë dhe Ibrahimovicin, një legjendë që e respektoj vërtet”, shtoi sulmuesi i PSG.

Franca është një nga favoritët për të fituar Kupën e Botës në fund të vitit, ndërsa Italia nuk ka arritur të kualifikohet për herë të dytë radhazi.

“Më mirë për ne, sepse Italia është një ekip i madh, por unë u pikëllova për miqtë e mi Marco Verratti dhe Gigio Donnarumma. Ishte e vështirë për ta sepse ne u eliminuam nga Liga e Kampionëve pas eliminimit të tyre në Kupën e Botës. Ky është futbolli. Italia do të ketë një brez të ri futbolli dhe ju do të ktheheni”, nënvizoi francezi.

Pse e refuzoi ofertën e Real Madridit për të vazhduar me PSG-në? A ishte gjithçka për paratë?

“Gjërat kanë ndryshuar. Unë jam francez, e di që jam i rëndësishëm për vendin tim, ndaj më duhej të mendoja mirë. Nuk ka të bëjë vetëm me futbollin, por edhe me jetën. Dua të jetoj mirë në vendin tim në fund të karrierës sime. Falënderoj Real Madridin dhe tifozët e tyre për dashurinë edhe pse e kam veshur atë fanellë vetëm për disa javë kur luaja në ekipet e të rinjve në moshën 14-vjeçare. Suksese në finalen e Ligës së Kampionëve.

Nuk kam folur për para me Florentinon apo Nasser Al Khelaifin. Vetëm për futbollin dhe titujt për të fituar. Nëna ime dhe avokatët flasin për para. Sigurisht, kam marrë para në llogarinë bankare dhe i hedh një sy ndonjëherë, por ajo që ka rëndësi për mua është fusha, fitimi i trofeve, të jem më i miri dhe të jem i lumtur dhe tani jam i lumtur”, ka përfunduar 23-vjeçari. /f.a/abcnews.al