Nga Erblina Mile
Ata persona që kanë dalë në pension dhe rezultojnë të vetëpunësuar tashmë nuk do të kenë detyrimin që të paguajnë kontribute shoqërore. Ndryshimet në projektligjin për sigurimet shoqërore janë hedhur për konsultim publik. Aktualisht janë 1. 484 përfitues të pensionit të pleqërisë të vetëpunësuar që paguajnë kontribute çdo muaj në vlerën e 14 milionë lekëve të cilat kalojnë në fondin e sigurimeve shoqërore.
Sipas relacionit shpjegohet se shuma 169,8 milionë lekë në vit me hyrjen në fuqi të këtyre ndryshimeve do të zbritet nga të ardhurat në fondin e sigurimeve shoqërore
Sipas relacionit shpjegohet se qëllimi i këtij projektakti, konsiston në përjashtimin e përfituesve të pensionit të pleqërisë të cilët vetëpunësohen në sektorin privat, pasi kanë fituar të drejtën për pension pleqërie, duke qenë se atyre nuk u njihet si periudhë sigurimi koha e vetëpunësimit.
Sipas qeverisë ky ndryshim është reflektuar pas kërkesës së bërë përmes nismës së Këshillimit Kombëtar nga rezultatet e të cilës u evidentua se 66% e qytetarëve kanë dhënë përgjigje pozitive për ndryshimin e ligjit aktual. /abcnews.al/
