Loading ...
Ishte një video vërtet e veçantë. Nga Arabia Saudite sapo u largua një futbollist shqiptar, dhe ja ku mbërrin një tjetër. Vendin e Mario Mitajt në atë ligë profesioniste do ta zerë Nedim Bajrami, edhe pse me skuadër tjetër.
Mesfushori i kombëtares u prezantua nga klubi i tij I ri, Al Tauon, në një mënyrë speciale, duke e krahasuar me një magjistar. Ai do të luajë këtë sezon i huazuar në Gjirin Persik, ndërsa kartonin e tij e mban ende Gllazgou Rejnxhërs.
Klubi I madh skocez kërkon 2.5 milionë euro për kartonin nëse Al Tauon do ta blejë atë verën e ardhshme. Pak a shumë, është e njëjta skemë si me Mitajn, që u huazua tek Xhenoa e Serisë A nga Al Itihadi saudit.
Dy sezonet e fundit, Bajrami luajti pikërisht për Rejnxhërsin, gjithsej në 63 ndeshje, duke shënuar 7 gola e shërbyer 5 asistë. Për 4 edicione më parë ishte në Itali, fillimisht me Empolin dhe pastaj me Sasuolon, duke provuar Serinë A dhe Serinë B, duke shënuar në Apenine 26 gola e shërbyer 26 asistë.
Largimi nga Europa mund të mos jetë kulmi i karrierës për mesfushorin e talentuar shqiptar 27-vjeçar, i cili në 2022 kishte karton me vlerë 10 milionë euro, katër herë më shumë se sot, dhe për të cilin u interesua, mes të tjerëve, edhe Milani.
Gjithsesi, nëse luan rregullisht dhe tregon potencialin që ka, mundësitë janë të gjitha për t’u kthyer në ligat e forta të kontinentit të vjetër./abcnews.al
