Amerikanët këtë të martë votojnë për zgjedhjet presidenciale. Këto janë zgjedhjet më të të polemizuara në dekada me presidentin aktual republikan, Donald Trump, përballë sfidantit të tij demokrat, Joe Biden.
Abc News dhe Abcnews.al mbrëmjen e sotme do të kenë një maratonë të gjatë transmetimi për të sjellë nga afër për të gjithë shqiptarët të rejat më të fundit në lidhje me procesin e votimit dhe daljen e rezultateve të para të zgjedhjeve në SHBA.
Duke filluar nga ora 21:00 deri në orët e para të mëngjesit të së mërkurës, “Amerika Live”, me Endri Xhafon në Abc, do të pasqyrojë dhe analizojë informacionet më të fundit në lidhje me këtë proces.
Ndërkohë qytetarët amerikanë kanë filluar me procesin e votimit, të parët që u janë drejtuar kutive të votimit në orën 10.00 sipas orës së Grinuiçit janë qytetarët në Vermont.
Ndërkaq dy rivalët i kaluan orët e fundit të garës duke bërë fushatë në shtetet kyce. Të hënën, presidenti Trump është ndalur në një seri shtetesh që konsiderohen fushëbeteja. Në Karolinën e Veriut, ai u tha mbështetësve se viti i ardhshëm, do të jetë më i madhi për ekonominë e vendit në histori.
Ndërsa Biden, shkoi në Pensilvani, ku atij iu bashkua këngëtarja Lady Gaga, ndërsa këngëtari John Legend iu drejtua zgjedhësve përkrah kandidates për zëvendëspresidente të demokratëve, Kamala Harris./abcnews.al
