Nga Xhensila Kodra
Në dy javët e fundit, Policia Rrugore në të gjithë vendin ka ndëshkuar me gjobë 30.824 shoferë që kanë kryer shkelje të ndryshme të Kodit Rrugor.
Pjesa më e madhe e tyre për shpejtësi tej normave të lejuara dhe parakalimet e gabuara.
Në dy javë aksion të Policisë Rrugore janë arrestuar 108 shoferë pjesa më e madhe e të cilëve lëviznin në gjendje të dehur, ndërsa 721 patenta janë pezulluar.
Kontrollet e shtuara nisën një ditë pas aksidentit të ndodhur në autostradën Fier-Vlorë, ku humbën jetën 4 anëtarët e një familje, bashkëshortët Eduart dhe Silvana Gushi, si dhe dy vajzat e mitura Eva dhe Anastasia.
Ata ishin kthyer nga Greqia për të kaluar pushimet në vendin tonë, teksa makina e tyre Toyota u përplas nga një tjetër mjet tip Audi që lëvizte me shpejtësi e që drejtohej nga 22 vjeçari Igli Madani.
Përveç këtij aksi, patrullat u shtuan edhe në autostradën Tiranë-Durrës, Tiranë-Elbasan, Lezhë-Milot, Elbasan-Rrogozhinë, në Rrugën e Kombit, në Kamzë e në shumë qendra të banuara.
Vetëm në 6 muajt e parë të këtij viti kanë ndodhur 675 aksidente që kanë shkaktuar 104 viktima në të gjithë vendin. /abcnews.al
