Tensionet po rriten midis qeverisë italiane dhe prodhuesit të makinave Stellantis. Policia ekonomike e Italisë sekuestroi dhjetëra Fiat Topolinos në portin e Livornos, sepse qeveria italiane beson se modeli më i vogël i Fiat nuk duhet të mbajë flamurin italian pasi prodhohet në Marok.
Qeveria ka vënë në shënjestër prodhuesin e makinave Stellantis sepse nuk pajtohet me përpjekjet e prodhuesit të makinave për të reduktuar kapacitetin e prodhimit në fabrikat italiane dhe për të zbatuar një program të gjerë pushimesh nga puna dhe shkurtime.
Aktiviteti kryesor i Stellantis është projektimi, zhvillimi, prodhimi dhe shitja e makinave të kompanive (në renditje alfabetike) Abarth, Alfa Romeo, Chrysler, Citroën, Dodge, DS Automobiles, Fiat, Fiat Professional, Jeep, Lancia, Maserati, Mopar, Opel, Peugeot, Ram dhe Vauxhall. Grupi Stellantis ka 300,000 punonjës, me një prani në më shumë se 130 vende dhe me objekte prodhimi në 30 vende.
Automjetet u bllokuan në portin e Livornos për shkelje të dyshuara të të ashtuquajturit ligji Made in Italy, i cili tashmë ka detyruar kompaninë mëmë të Fiat Stellantis të riemërtojë makinën e saj sportive Alfa Romeo Milano Junior, raporton Bloomberg.
Një zëdhënës i Stellantis konfirmoi konfiskimin, i cili u raportua fillimisht nga mediat italiane, përfshirë La Repubblica./abcnews.al
