(Në foto Gjergj Ndërshtiqa, student në Akademinë e Sigurisë)
SHKODËR- Policia e Shkodrës ka reaguar për plagosjen e dyfishtë në fshatin Grudë e Re. Të plagosurit janë Gjon Nika dhe kunati i tij Gjergj Ndërshtiqa, student në Akademinë e Sigurisë.
Të dy këta shtetas janë transportuar në spital, për ndihmë mjekësore, ndërsa policia, RENEA dhe specialistë nga Departamenti i Policisë Kriminale në Policinë e Shtetit janë nisur drejt vendngjarjes.
Njoftimi i policisë:
Rreth orës 19:30, në afërsi të një lokali në fshatin Grudë e Re, është qëlluar me armë zjarri një 30 vjeçar. Si pasojë e të shtënave është plagosur edhe kunati i tij, shtetasi 28 vjeçar , student në Akademinë e Sigurisë. Të dy këta shtetas janë transportuar në spital, për ndihmë mjekësore.
Në drejtim të vendit të ngjarjes janë nisur shërbimet e Policisë, drejtuesit e Drejtorisë Vendore të Policisë dhe të Komisariatit të Policisë Shkodër.
Në ndihmë të Policisë vendore janë nisur disa grupe të Forcës Kombëtare të Sigurisë dhe të RENEA-s, si dhe specialistë nga Departamenti i Policisë Kriminale në Policinë e Shtetit.
Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët.
Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit. Pas sqarimit të rrethanave të ngjarjes dhe në përfundim të veprimeve të para, do të ketë informacion më të detajuar për këtë rast.
