Pasi u zgjodh si anëtar i Bordit të Futbollit të UEFA-s, organ ky i krijuar së fundmi për të diskutuar disa nga çështjet më të rëndësishme në futbollin evropian me 19 trajnerë të tjerë ndërkombëtarë, tekniku portugez, Jose Mourinho ka vendosur të japë dorëheqjen nga pozicioni i tij.
Dorëheqja e Mourinho vjen vetëm pak ditë pasi Komisioni i Etikës dhe Disiplinës në UEFA e pezulloi katër ndeshje trajnerin e Romës për sulmin që i bëri gjyqtarit anglez, Anthony Taylor, në përfundim të finales së humbur përballë Sevillas, në Europa League.
Vendimin e tij, tekniku portugez ka vendosur t’ia komunikojë më një e-mail të thjeshtë, drejtuesit të Bordit të Futbollit, Zvonimir Boban, ku në të shkruhej që t’ia përcillte vendimin e tij dhe Presidentit, Aleksander Ceferin.
“I dashur Boban, duke ju falënderuar që më keni ftuar të jem anëtar i Bordit të Futbollit, më vjen keq t’ju informoj se do të heq dorë nga pjesëmarrja ime në këtë grup me efekt të menjëhershëm”, ka shpjeguar Mourinho në e-mail. /i.m /abcnews.al
