Të paktën 16 persona, përfshirë shumë fëmijë, kanë vdekur në Oman, nga përmbytjet e shkaktuara nga shirat e dendur që kanë goditur vendin e Gjirit që nga e diela, thanë autoritetet.
Agjencia zyrtare e lajmeve e Omanit raportoi se nëntë studentë dhe tre të rritur “vdiqën pasi automjeti me të cilin po udhëtonin u rrëmbye nga përmbytjet” në rajonin verior të As-Sharqiya, që ndodhet në pjesën lindore të vendit, rreth 150 kilometra nga kryeqyteti Muscat, ndërsa pesë persona janë të zhdukur.
Sipas të njëjtit burim, këtë të hënë janë gjetur trupat e një fëmije dhe tre personave të tjerë.
Stuhi të forta, të shoqëruara me shira të dendur dhe erëra të forta, kanë goditur Omanin që nga e diela, duke shkaktuar përmbytje në shumë provinca në pjesët veriore dhe lindore të vendit.
Sot, shkollat mbetën të mbyllura në shumicën e qarqeve të vendit. Përmbytjet tashmë kanë shkaktuar vdekjen e 3 fëmijëve më 12 shkurt.
Forcat ajrore të Omanit kanë ndërhyrë vazhdimisht gjatë orëve të fundit, duke operuar me helikopterë, për të çliruar personat e bllokuar.
Moti i keq pritet të vazhdojë deri të mërkurën dhe brenda orëve të ardhshme të prekë edhe vendet e tjera të Gjirit, veçanërisht Bahreinin dhe Emiratet e Bashkuara Arabe./abcnews.al
