Një zyrtar izraelit i paidentifikuar konfirmoi se qeveria izraelite ka hartuar një propozim për një marrëveshje paqeje, e cila parashikon lirimin e të gjithë pengjeve dhe përfundimin e luftimeve në Rripin e Gazës, me largimin e sigurt të liderit palestinez të Hamasit nga ai territor.
Ai tha për ‘The Times of Israel’ se zyrtari izraelit Gal Hirsch ua prezantoi propozimin amerikanëve dhe se ata pritet t’ia paraqesin atë zyrtarëve arabë.
Ai deklaroi se marrëveshja, nëse përmbushen dispozitat e saj, do të nënkuptonte fundin e luftës midis Izraelit dhe Hamasit, e cila filloi më 7 tetor 2023, me një sulm të ekstremistëve palestinezë në pjesën jugore të territorit izraelit.
Shërbimi publik izraelit Khan njoftoi më parë se qeveria e Izraelit kishte hartuar një marrëveshje kornizë që, ndër të tjera, do të mundësonte largimin e sigurt të liderit të Hamasit, Yahya Sinwar dhe bashkëpunëtorëve të tij nga Rripi i Gazës.
Propozimi parashikon lirimin e të gjithë të burgosurve palestinezë nga burgjet izraelite, çmilitarizimin e Rripit të Gazës dhe vendosjen e një sistemi të ri menaxhimi në atë territor palestinez. Detaje të tjera nuk janë bërë të ditura.
Forumi i Familjeve të Pengjeve dhe të Zhdukurve përshëndeti marrëveshjen e propozuar, duke deklaruar se lirimi i 101 pengjeve është dëshira e të gjithë qytetarëve izraelitë dhe u bëri thirrje të gjithë anëtarëve të qeverisë izraelite ta mbështesin atë./abcnews.al
