Danilo është një nga lojtarët më të mirë të Juventusit gjatë këtij sezoni. Mbrojtësi po bën shumë mirë në drejtimin e Pirlos dhe shprehet se po kalon formën më të mirë në karrierë. Braziliani tregoi se mënyra sesi e sheh Pirlo futbollin dhe ngjashmëria e tij me idetë e Guardiolës, ka ndikuar në rritjen e tij.
“Po përballeni me Danilon më të mirë në vitet e fundit. Më parë, më mungonte vazhdimësia, më duheshin shumë ndeshje për të kapur më të mirën dhe në këtë rast po më ndihmon sezoni i gjatë. Jam i kënaqur me nivelin në të cilin po luaj dhe që kam qenë në gjendje ta ndihmoj më shumë ekipin.
Shumë role? Nuk e kam të vështirë të ndryshoj sepse mënyra ime për të parë futbollin ka qenë gjithmonë e tillë. Më pëlqen të analizoj lëvizjet, hapësirat… Nuk mund të luaj si qendërsulmues, por nuk e kam problem të luaj si mbrojtës qendre apo mesfushor.
Më pëlqen shumë të marr pjesë në ndërtimin e lojës dhe Pirlo më jep shumë liri për të ndihmuar: ai dëshiron që topi të dalë i pastër në mënyrë që kushdo të jetë përpara, të mund të komplikojë jetën e kundërshtarëve. Ai dëshiron që unë të lëviz dhe ta prek shumë topin.
Pirlo dhe Guardiola? Pep dhe stafi i tij kanë ide futbolli shumë të ngjashme me atë të Pirlos. Ata mendojnë për futbollin nga pushtimi i hapësirave, ata analizojnë se si të parashikojnë lëvizjet e kundërshtarit. Më pëlqen dhe kjo është arsyeja pse mendoj se gjërat po shkojnë mirë për mua”, u shpreh Danilo. /abcnews.al
